Apple-ը ներկայացրել է երկրորդ սերնդի AirTag-ը՝ ընդլայնված որոնման շառավղով և բարձրացված ձայնով

AirTag-ը նախատեսված է կորած իրերի որոնման համար:

Apple-ը պաշտոնապես ներկայացրել է իր Bluetooth-պիտակի երկրորդ սերնդի տարբերակը՝ AirTag 2-ը։ Ընկերության կայքում հրապարակված տեղեկատվության համաձայն՝ թարմացումները հիմնականում վերաբերում են որոնման շառավղին և ներկառուցված բարձրախոսի ձայնի ուժգնությանը։

Առաջին կարևոր փոփոխությունը վերաբերում է «Ճշգրիտ որոնում» (Precision Finding) գործառույթին։ Նոր AirTag-ը հնարավորություն է տալիս որոնում իրականացնել շուրջ 50 տոկոսով ավելի մեծ հեռավորությունից՝ համեմատած առաջին սերնդի մոդելի հետ։ Սա պայմանավորված է նոր Bluetooth-չիպի կիրառմամբ և գերլայնաշերտ UWB մոդուլի ավելի ճշգրիտ աշխատանքով։

Երկրորդ փոփոխությունը վերաբերում է բարձրախոսին։ Apple-ի տվյալներով՝ ներկառուցված բարձրախոսի ձայնը դարձել է մոտ 50 տոկոսով ավելի բարձր, ինչը նպատակ ունի հեշտացնել պիտակի հայտնաբերումը աղմկոտ միջավայրում կամ դժվար հասանելի տեղերում։

AirTag 2-ը արտաքին տեսքով և չափսերով փոփոխություն չի կրել։ Սարքը պահպանել է 31.9 մմ տրամագիծը, 8 մմ հաստությունը, IP67 պաշտպանությունը և փոխարինվող CR2032 մարտկոցը։ «Լոկատոր» (Find My) ցանցի աջակցությունը, հետապնդումից պաշտպանությունը և «Կորուստ» ռեժիմը նույնպես մնացել են անփոփոխ։

Apple-ը պահպանել է նաև գները։ ԱՄՆ-ում մեկ AirTag-ի արժեքը կազմում է 29 դոլար, իսկ չորս հատից բաղկացած հավաքածուինը՝ 99 դոլար։ Վաճառքը կմեկնարկի 2026 թվականի հունվարի 26-ին։

AirTag-ը նախատեսված է կորած իրերի որոնման համար և օգտագործվում է բանալիների, պայուսակների, ճամպրուկների, մանկասայլակների, ինչպես նաև այլ անձնական իրերի հետ։ «Լոկատոր» ցանցի միջոցով պիտակը կարող է փոխանցել իր գտնվելու վայրը նույնիսկ այն դեպքում, երբ օգտագործողի iPhone-ը մոտակայքում չէ։