Չինաստանից Հայաստան ներմուծվող որոշ ապրանքների համար հակագնագցման տուրք սահմանվեց

Որոշմամբ նախատեսվում է 2026 թվականի հունվարի 18-ից մինչև 2031 թվականի հունվարի 18-ը կիրառել հակագնագցման տուրք՝ տարեկան 700 տոննա ծավալի շրջանակում։

ՀՀ կառավարությունը ապրիլի 2-ի նիստում հաստատել է Եվրասիական տնտեսական հանձնաժողովի որոշումը՝ Չինաստանից ԵԱՏՄ տարածք ներմուծվող գրաֆիտացված էլեկտրոդների նկատմամբ հակագնագցման տուրքի կիրառման վերաբերյալ։

Որոշմամբ նախատեսվում է 2026 թվականի հունվարի 18-ից մինչև 2031 թվականի հունվարի 18-ը կիրառել հակագնագցման տուրք՝ տարեկան 700 տոննա ծավալի շրջանակում։

Կարգավորումը վերաբերում է Չինաստանի ծագում ունեցող գրաֆիտացված էլեկտրոդներին, որոնք օգտագործվում են էլեկտրական աղեղային վառարաններում՝ մետաղների և համաձուլվածքների հալեցման գործընթացում։

Միաժամանակ նախատեսվում է բացառություն․ հակագնագցման տուրքը չի կիրառվի Liaoning Dantan New Materials Co., Ltd. ընկերության արտադրանքի նկատմամբ՝ պայմանով, որ ներկայացված լինի արտադրողի հավաստագիր՝ պատշաճ ձևակերպմամբ։

Հակագնագցման միջոցառումները կիրառվում են այն դեպքերում, երբ ներմուծվող արտադրանքը շուկայում առաջարկվում է ցածր գներով՝ ազդելով մրցակցության պայմանների վրա։

Տվյալ որոշումը նպատակ ունի կարգավորել շուկայի մրցակցային միջավայրը և պաշտպանել արտադրական շղթաների կայունությունը ԵԱՏՄ տարածքում։