10 օրից կգործարկվի վարչական դատավարության էլեկտրոնային համակարգը

10 օրից կգործարկվի վարչական դատավարության էլեկտրոնային համակարգը:

Oգոստոսի 25-ից Արդարադատության նախարարության կողմից կգործարկվի վարչական դատավարության նոր էլեկտրոնային համակարգը, որը քաղաքացիներին, փաստաբաններին և պետական բոլոր մարմիններին հնարավորություն է ընձեռելու վարչական գործերով ամբողջությամբ թվային եղանակով ներկայացնել հայցադիմում, վերաքննիչ և վճռաբեկ բողոքներ, ինչպես նաև կատարել բոլոր դատավարական գործողությունները՝ արագ և առանց ձգձգումների: Այս մասին տեղեկացնում են ՀՀ արդարադատության նախարարությունից:

Օգոստոսի 25-ից համակարգի օգտագործումը պարտադիր է դառնալու վարչական գործերով հետևյալ մասնակիցներ համար, այդ թվում՝

• պետական և տեղական ինքնակառավարման բոլոր մարմինների,
• վարչարարություն իրականացնող այլ մարմինների, դրանց պաշտոնատար անձանց,
• իրավաբանական անձանց և անհատ ձեռնարկատերերի,
• ներկայացուցիչ հանդիսացող փաստաբանների,
• սնանկության գործով կառավարիչների,
• արտոնագրված հաշտարարների,
• նոտարների և այլն:

Ֆիզիկական անձանց համար համակարգի օգտագործումը պարտադիր է դառնալու, եթե տվյալ ֆիզիկական անձը վարչական գործի շրջանակներում առնվազն մեկ անգամ նոր համակարգի միջոցով կատարել է որևէ գործողություն և հետագայում գործը քննող դատարանին տեղյակ չի պահել համակարգից օգտվելու անհնարինության մասին: