Ամունդի -Ակբայի ֆոնդերը ռեկորդային ցուցանիշ են գրանցել

·         Կուտակային կենսաթոշակային ֆոնդերի զուտ ակտիվները գերազանցել են ռեկորդային 700 մլրդ ՀՀ դրամը

·         Կառավարման շնորհիվ ապահոված եկամուտը կազմել է 25.4% (2025թ. հոկտեմբերի 31-ի դրությամբ)

Ամունդի-Ակբա Ասեթ Մենեջմենթը 2025թ. հոկտեմբերի 31-ի դրությամբ գրանցել է կառավարման ներքո ակտիվների ռեկորդային ծավալ՝ 713.9 միլիարդ ՀՀ դրամ, որից 181 մլրդ ՀՀ դրամը կամ 25.4%-ը կառավարման շնորհիվ ապահովված եկամուտն է։

Ընկերության կողմից կառավարվող հավասարակշռված, պահպանողական և կայուն եկամտային կենսաթոշակային ֆոնդերին միացած մասնակիցների քանակը 550,474 է:

Այս ձեռքբերումը ևս մեկ անգամ վկայում է Ամունդի-Ակբայի նկատմամբ կուտակային կենսաթոշակային համակարգի մասնակիցների բարձր վստահության մասին։ Ընկերությունը հավատարիմ է իր հիմնական առաքելությանը՝ ձևավորել որակյալ ներդրումային պորտֆել՝ կատարելով երկարաժամկետ ներդրումներ ռիսկի ընդունելի մակարդակում։

Ֆոնդերի ներդրումները

Ֆոնդերը դիվերսիֆիկացված են տարբեր ներդրումային ակտիվներում և տարբեր տարածաշրջաններում, որոնք ներառում են ինչպես անուղղակի, այնպես էլ ուղղակի ներդրումներ։

Հոկտեմբերի վերջի դրությամբ ֆոնդերի 62.2%-ը (443.8 մլրդ) ներդրված է Հայաստանում, մասնավորապես՝ ՀՀ պետական պարտատոմսերում, բաժնետոմսերում, բանկային ավանդներում, կորպորատիվ պարտատոմսերում, մասնավոր բաժնեմասնակցային ֆոնդում և դրամական շուկայի գործիքներում։

Արտասահմանյան ներդրումները կատարվում են տարբեր տարածաշրջանային շուկաներում, այդ թվում՝ Հյուսիսային Ամերիա (21.2%), Եվրագոտի (7.6%), ԵՄ առանց Եվրագոտու (1.6%), Զարգացող երկրներ (5.1%), ասիական երկրներ (1.3%) և այլն։ Ընդհանուր առմամբ ֆոնդերի 37.8%-ը կազմում են արտասահմանյան ներդրումները։

Ամունդի-Ակբայի կողմից կառավարվող կենսաթոշակային ֆոնդերի ներդրումների և եկամտաբերության վերաբերյալ 2025թ․3-րդ եռամսյակի ցուցանիշներին կարող եք ծանոթանալ կից հղմամբ` https://amundi-acba.am/hy/article/investments-and-performance-q3-2025:

Ամունդի-Ակբա Ասեթ Մենեջմենթի մասին

Ամունդի-Ակբա Ասեթ Մենեջմենթը հիմնադրվել է 2013թ: Ընկերությունը կառավարում է երեք պարտադիր կուտակային կենսաթոշակային ֆոնդ՝ 2025թ․ հոկտեմբերի 31-ի դրությամբ կառավարման ներքո ունենալով շուրջ 714 մլրդ դրամ ակտիվներ։

Ընկերության բաժնետերերն են ֆրանսիական Ամունդին, որը Եվրոպայի առաջատար ակտիվների կառավարիչն է ավելի քան 2.3 տրիլիոն եվրո կառավաման ներքո ակտիվներով 2025թ․սեպտեմբերի 30-ի դրությամբ, և Ակբա Բանկը, որը Հայաստանի խոշոր ֆինանսական հաստատություններից է, ներկայացված է երկրի ամբողջ տարածքում, ունի 66 մասնաճյուղ։