ԱՄՆ Պետդեպարտամենտը պաշտոնական նախազգուշացում է հղել Մերձավոր Արևելքում գտնվող Միացյալ Նահանգների քաղաքացիներին՝ կոչ անելով ցուցաբերել առավելագույն զգոնություն։ Արտաքին քաղաքական գերատեսչությունը զգուշացրել է իրավիճակի հնարավոր կտրուկ սրման, ավիաչվերթների զանգվածային չեղարկումների, օդային տարածքի փակման և տրանսպորտային լուրջ խափանումների մասին։
Ինչու է դա կարևոր. Վաշինգտոնն ընդգծում է, որ ռազմական գործողություններն ու անվտանգային ռիսկերը կարող են դուրս գալ Մերձավոր Արևելքի տարածաշրջանային սահմաններից: Պետդեպի գնահատմամբ՝ Իրանը և նրան աջակցող դերակատարները կարող են թիրախավորել ամերիկյան օբյեկտներն ու քաղաքացիներին ողջ աշխարհում:
Հայտարարության առանցքային շեշտադրումները.
Տրանսպորտային և ավիացիոն ռիսկեր. Մերձավոր Արևելքում գտնվող ԱՄՆ քաղաքացիները պետք է պատրաստ լինեն թռիչքների հանկարծակի չեղարկումներին, օդային տարածքների փակմանը և լոգիստիկ ընդհանուր խափանումներին:
Աշխարհագրության ընդլայնում. Պետդեպարտամենտը հատուկ շեշտել է, որ սպառնալիքները սահմանափակված չեն միայն Մերձավոր Արևելքով. ռազմական գործողությունները կարող են ծավալվել տարածաշրջանից դուրս:
Գլոբալ թիրախներ. Իրանը և հարակից խմբավորումները կարող են հարվածներ հասցնել արտերկրում ԱՄՆ շահերն արտահայտող օբյեկտներին, ամերիկյան ձեռնարկություններին, հաստատություններին և ԱՄՆ քաղաքացիներին՝ աշխարհի ցանկացած կետում:
