Ալիևը հայտնել է «Զանգեզուրի միջանցքի» նախագծի իրականացման փուլերի մասին

Նրա խոսքով՝ ավտոճանապարհը պատրաստ է շուրջ 90%-ով, իսկ երկաթգիծը՝ մոտ 70%-ով։

Ադրբեջանի նախագահ Իլհամ Ալիևը հայտարարել է, որ «Զանգեզուրի միջանցքի» շրջանակում ավտոմոբիլային ճանապարհի շինարարությունը մոտ է ավարտին, իսկ երկաթուղային ենթակառուցվածքը գտնվում է իրականացվածության ավելի վաղ փուլում։

Նրա խոսքով՝ ավտոճանապարհը պատրաստ է շուրջ 90%-ով, իսկ երկաթգիծը՝ մոտ 70%-ով։

Ալիևը նշել է, որ նախագծի նպատակն է ստեղծել նոր տրանսպորտային կապ տարածաշրջանում՝ կապելով այն միջազգային լոգիստիկ երթուղիներին։

Նա նաև ընդգծել է Թուրքիայի հետ համակարգված աշխատանքի կարևորությունը՝ տեղեկացնելով, որ Թուրքիայում մեկնարկել է Կարս-Նախիջևան երկաթգծի շինարարությունը։

Ադրբեջանի նախագահի գնահատմամբ՝ այս ենթակառուցվածքային նախագծերի համադրումը կարող է ձևավորել նոր միջազգային միջանցք, որը կդառնա «Միջին միջանցքի» բաղադրիչ։

Նրա ներկայացմամբ՝ կառուցվող երկաթուղային ենթակառուցվածքի նախնական տարողությունը նախատեսված է տարեկան մինչև 15 միլիոն տոննա բեռնափոխադրումների համար՝ հետագա աճի հնարավորությամբ։

Հայտարարությունները ներկայացնում են Ադրբեջանի դիրքորոշումը տարածաշրջանային տրանսպորտային նախագծերի զարգացման վերաբերյալ։