Օդի արտանետումների և վտանգավոր թափոնների հաշվետվությունների իրականացում բացառապես էլեկտրոնային եղանակով

Հաշվետվությունների ներկայացումը, տվյալների ամփոփումն ու արխիվացումը ևս իրականացվում են միայն էլեկտրոնային եղանակով։

Շրջակա միջավայրի նախարարությունը տեղեկացնում է, որ Կառավարության 2025 թվականի հուլիսի 24-ի N 1008-Ն և N 1001-Ն որոշումների համաձայն՝ շրջակա միջավայրի ոլորտում վարչական վիճակագրական հաշվետվությունների ներկայացումը իրականացվում է բացառապես էլեկտրոնային եղանակով։

Էլեկտրոնային ընթացակարգը վերաբերում է պետական հաշվառման ենթակա մթնոլորտային օդն աղտոտող նյութերի արտանետումների աղբյուրներ ունեցող իրավաբանական անձանց և ձեռնարկատիրական գործունեությամբ զբաղվող ֆիզիկական անձանց կողմից տարեկան վարչական վիճակագրական հաշվետվությունների ներկայացմանը, ինչպես նաև ներկայացված տվյալների ամփոփման և արխիվացման գործընթացներին։

Նույն կարգավորումը տարածվում է նաև պետական հաշվառման ենթակա վտանգավոր թափոններ առաջացնող և թափոնների տեղադրում իրականացնող իրավաբանական անձանց, այդ թվում՝ օտարերկրյա կազմակերպությունների և անհատ ձեռնարկատերերի վրա։ Նրանց տարեկան վարչական վիճակագրական հաշվետվությունների ներկայացումը, տվյալների ամփոփումն ու արխիվացումը ևս իրականացվում են միայն էլեկտրոնային եղանակով։

Հաշվետվությունների ընդունումն ու տվյալների մշակումը իրականացվում է «Շրջակա միջավայրի կառավարման ոլորտի թվային ծառայությունների հարթակ» էլեկտրոնային համակարգի միջոցով՝ nature.e-gov.am հասցեում։