«Ակադեմիական քաղաք» ծրագրի համար խորհրդատվություն կգնվի մեկ անձից՝ մինչև 740 հազար ֆունտի չափով

Երաժշտության բաղադրիչի ձևավորման համար խորհրդատվություն կգնվի Շոտլանդիայի թագավորական կոնսերվատորիայից։

Կառավարությունը մարտի 12-ի նիստում որոշում է կայացրել «Ակադեմիական քաղաք» ծրագրի շրջանակում խորհրդատվական ծառայությունների ձեռքբերման գործընթացը կազմակերպել մեկ անձից գնման ընթացակարգով։

Որոշումը վերաբերում է Ակադեմիական քաղաքի արվեստների կլաստերի ձևավորմանը։ Խորհրդատվական ծառայությունները ձեռք կբերվեն երկու միջազգային հեղինակավոր կրթական հաստատություններից։

Արվեստների կլաստերի (բացառությամբ երաժշտության բաղադրիչի) ձևավորման նպատակով նախատեսվում է համագործակցել Լոնդոնի արվեստների համալսարանի (University of the Arts London, UAL) հետ՝ մինչև 368,778 բրիտանական ֆունտ ստեռլինգին համարժեք դրամի չափով։

UAL-ը արդեն յոթերորդ տարին անընդմեջ համարվում է աշխարհի լավագույն բուհը արվեստի և դիզայնի բակալավրիատի ծրագրերի ոլորտում։ QS World University Rankings by Subject 2025 վարկանիշում այն զբաղեցնում է երկրորդ հորիզոնականը՝ զիջելով միայն Արվեստի թագավորական քոլեջին, որը մասնագիտացած է հետբակալավրիական կրթության մեջ։

Երաժշտության բաղադրիչի ձևավորման համար խորհրդատվություն կգնվի Շոտլանդիայի թագավորական կոնսերվատորիայից (Royal Conservatoire of Scotland, RCS)՝ մինչև 371,325 ֆունտ ստեռլինգին համարժեք դրամի չափով։

RCS-ը համաշխարհային առաջատարներից է կատարողական արվեստների կրթության ոլորտում և արդեն իններորդ անգամ ընդգրկվել է QS վարկանիշի լավագույն վեցնյակում՝ կատարողական արվեստների ուղղությամբ։

Կառավարության հիմնավորմամբ՝ մեկ անձից գնման ընթացակարգը պայմանավորված է բացառիկ փորձ և միջազգային բարձր վարկանիշ ունեցող կազմակերպությունների ներգրավման անհրաժեշտությամբ։