ՀՀ-ում հիմնադրվել է տեքստիլի ոլորտի համակարգող նոր կառույց

Հիմնադրամը նպատակ ունի համակարգված զարգացնել տեքստիլ արդյունաբերությունը:

ՀՀ կառավարությունը ընդունել է որոշում՝ ստեղծելու «Տեքստիլ ոլորտի օպերատոր» հիմնադրամ և հաստատել դրա կանոնադրությունը։

Հիմնադրամը նպատակ ունի համակարգված զարգացնել տեքստիլ արդյունաբերությունը՝ աջակցելով ոլորտի պետական և մասնավոր նախաձեռնություններին, խթանելով ռեսուրսների նպատակային օգտագործումը, արտահանման ու մրցունակության բարձրացումը։

Օպերատորը կնպաստի ոլորտի նորագույն տեխնոլոգիաների կիրառմանը, արտադրության արդիականացմանը, հայկական տեքստիլի միջազգային ճանաչելիության բարձրացմանը, ինչպես նաև մարզերում աշխատատեղերի ստեղծմանը։

Այն կդառնա գործիք՝ որի միջոցով կկազմակերպվեն ոլորտի քարտեզագրումները, միջազգային ցուցահանդեսներին մասնակցությունը, բրենդավորման գործընթացները և էլեկտրոնային վաճառքների խթանումը։ Հիմնադրամը նպաստելու է նաև տեղական արտադրության և հումքի զարգացմանը՝ մեծացնելով արտարժույթի հոսքը և վճարային հաշվեկշռի բարելավումը։