Քերոբյան. Չենք օժանդակում պատժամիջոցների շրջանցումը ՌԴ գործընկերների կողմից Հայաստանն ու Ռուսաստանը գտնվում են նույն մաքսային եւ տնտեսական գոտում, նշանակում է, որ երկրների միջեւ ապրանքների տեղաշարժն ազատ է, կառավարության նիստից հետո լրագրողների հետ զրույցում ասել է ՀՀ էկոնոմիկայի նախարար Վահան Քերոբյանը: «Ամերիկյան եւ եվրոպական մեր գործընկերներին բացատրում ենք, որ հայկական ընկերությունների գործողությունները նպատակ չունեն ՀՀ-ն երկրորդային պատժամիջոցների տակ գցելու, այլ այդ գործողությունները բխում են մեր երկրի տնտեսական եւ աշխատանքային շահերից: Մենք որեւէ կերպ չենք փորձում օժանդակել պատժամիջոցների շրջանցումը մեր ռուս գործընկերների կողմից»,- ասել է նախարարը: Վահան Քերոբյանի խոսքով՝ հայկական կողմը փորձում է պահպանել թե ԵԱՏՄ պայմանագրի դրույթները, թե ապահովել, որ ՀՀ ընկերությունները չընկնեն երկրորդային պատժամիջոցների տակ: «Միաժամանակ, սա չի նշանակում՝ դա բացառված է, քանի որ արդեն կան որոշ ընկերություններ, որ ընկել են պատժամիջոցների տակ, բայց դա այդ ընկերությունների ռիսկն է: Մենք մեր մաքսային, բանկային եւ այլ գործիքակազմով փորձում ենք ապահովել մեր երկրի ընկերությունների պատժամիջոցների տակ չընկնելն ու անվտանգությունը: Մենք հետամուտ ենք մեր երկրի տնտեսական շահերը պաշտպանելուն եւ դա կարողանում ենք պատշաճ բացատրել մեր գործընկերներին»,- ասել է Վահան Քերոբյանը: