Կառավարությունը ևս 6,3 մլրդ դրամ կհատկացնի ՏՏ ոլորտի աջակցության համար

Կառավարությունն իր այսօրվա՝ ապրիլի 6-ի նիստում որոշում կայացրեց հավելյալ 6,3 մլրդ դրամ հատկացնել ՏՏ ոլորտի ընկերություններին տրամադրվող պետական աջակցության համար։ Կառավարության որոշման նախագծում ասվում է, որ 2023 թ․ պետական բյուջեով «Պետական աջակցություն տեղեկատվական տեխնոլոգիաների ոլորտում գործունեություն իրականացնող առևտրային կազմակերպություններին և անհատ ձեռնարկատերերին» միջոցառման համար հատկացված է եղել 2 մլրդ դրամ, որն ամբողջությամբ վճարվել ու սպառվել է: Հաշվի առնելով նախորդ ամիսների դինամիկան, անհրաժեշտություն է առաջացել հիշյալ միջոցառման բյուջեն ավելացնել ևս 1,5 մլրդ դրամով (2022-ի դեկտեմբեր և 2023-ի հունվար և փետրվար ամիսների համար պետական աջակցություն ստանալու նպատակով դիմումներն արդեն ստացվել են)։ Բացի դրանից, ՀՀ կառավարության 01.12.2022թ․ թիվ 1863-Լ որոշմամբ սահմանված պետական աջակցության գումարները վճարելու համար անհրաժեշտ է ևս 4 մլրդ 858 մլն դրամ գումար (206 կազմակերպության): Հետևաբար, հաշվի առնելով առաջին եռամսյակի դինամիկան, կառավարությունը որոշել է ծրագրի բյուջեն հասցնել 6 մլրդ 358 մլն դրամի։ Հիշեցնենք, որ 2022 թ․ ընթացքում Հայաստանում արտարժույթի արժեզրկման պատճառով ՀՀ-ում աշխատող ՏՏ ոլորտի ընկերությունները եկամուտների լուրջ կորուստներ էին ունենում։ Ժամանակավոր բարդությունները հարթելու համար կառավարությունը 2022թ․ դեկտեմբերի 1-ին որոշում էր կայացրել 10 մլրդ դրամ հատկացրել ՏՏ ոլորտին աջակցելու նպատակով։