iPhone 15-ը և 15 Pro-ն արտաքնապես չեն տարբերվի

Նոր Apple iPhone 15 և iPhone 15 Plus սմարթֆոնների բազային տարբերակները կստանան 48 մեգապիքսելանոց նույն տեսախցիկը, ինչ ավելի թանկ Pro մոդելները։ Այս մասին հայտնում է MacRumors պորտալը՝ վկայակոչելով Haitong International Securities ընկերության վերլուծաբան Ջեֆ Պուի խոսքերը։ Ակնկալվում է, որ եռաշերտ 48 մեգապիքսելանոց նոր սենսորը կկարողանա մեծ ծավալի լույս կլանել, ինչի շնորհիվ էապես կբարելավվի լուսանկարների որակը: Սակայն, ըստ Ջեֆ Պուի, եթե Apple-ը նման որոշում կայացնի, ապա դա կարող է հանգեցնել iPhone 15-ի և iPhone 15 Plus-ի արտադրության հետաձգման։ Այս պահին ընկերության բրենդային նոր հեռախոսների շնորհանդեսը նախատեսված է 2023-ի սեպտեմբերին։ Ջեֆ Պուն նաև պնդում է, որ «դիզայնի խնդիրների» պատճառով iPhone 15 Pro մոդելները չեն ստանա ձայնի կարգավորման կողային հատուկ սենսորային կոճակները։ Այնուամենայնիվ, վերլուծաբանը դեռ վստահ է, որ Pro մոդելները կհամալրվեն տիտանե շրջանակով, բարելավված A17 Bionic չիպով և ավելացված օպերատիվ հիշողությամբ: Նաև iPhone 15 շարքի բոլոր չորս մոդելները կհամալրվեն USB-C պորտով՝ սովորական Lightning-ի փոխարեն։ NEWS.am Tech-ն ավելի վաղ տեղեկացրել էր, որ Չինաստանում iPhone 14 Pro-ի օգտատերերը բողոքում են, որ սովորական օգտագործման ժամանակ մարտկոցը կարող է ուռչել, ինչի հետևանքով էկրանն սկսում է պոկվել հեռախոսի պատյանից։ Օգտատերերը սմարթֆոններն ուղարկել են սպասարկման ծառայություն՝ փոխարինման, սակայն շատ դեպքերում ծառայությունը հեռախոսները չի փոխարինել նորով, շտկել է միայն ուռածության խնդիրը, իսկ մարտկոցի մասին մանրամասներ չեն հայտնել: