Ներմուծման նոր սահմանափակումներ. ինչպե՞ս կազդի ձեր գնումների վրա ՀՀ կառավարությունն այսօրվա նիստում որոշում է կայացրել նվազեցնել առանց մաքսատուրքի ցամաքային սահմանով և փոստով ներմուծվող ապրանքների առավելագույն ծավալը: Նախկինում առանց մաքսատուրքի հնարավոր էր ներմուծել մինչև 500 եվրո արժողությամբ և մինչև 25 կգ ընդհանուր քաշով ապրանքներ, սակայն այժմ այդ սահմանաչափերը կնվազեն՝ համապատասխանաբար մինչև 200 եվրո և 10 կգ: Փոստային առաքումներով ներմուծվող ապրանքների անմաքս շեմը նույնպես իջեցվել է՝ մինչև 200 հազար դրամ և 31 կգ: Նախկինում այն կազմում էր 1000 եվրո և 31 կգ՝ ըստ ԵԱՏՄ կանոնների։ Որոշումն ուժի մեջ կմտնի ՀՀ արդարադատության նախարարության պաշտոնական հրապարակումից 10 օր հետո: Այս փոփոխությունները չեն վերաբերում օդային տրանսպորտով ժամանող ուղևորներին, որոնց համար անմաքս շեմը դեռևս կպահպանվի 10 հազար եվրո և 50 կգ մակարդակում: Հիշեցնենք, որ ԵԱՏՄ կանոնների համաձայն, անմաքս շեմը գերազանցելու դեպքում անհրաժեշտ է վճարել ծանրոցների դեպքում արժեքի 15%-ը, բայց ոչ պակաս, քան 2 եվրո յուրաքանչյուր ավելորդ կիլոգրամի համար, իսկ ուղեբեռով ներմուծվող ապրանքների համար՝ արժեքի 30%-ը, բայց ոչ պակաս, քան 4 եվրո յուրաքանչյուր ավելորդ կիլոգրամի համար։