Հայաստանը կպահպանի ԱՊՀ+ տարածաշրջանում տնտեսական աճի ամենաբարձր տեմպերից մեկը՝ 2024թ․–ին 6,5% մակարդակում՝ 2023 թվականի 8,1%-ից հետո։ Նման կանխատեսում է ներկայացված Renaissance Capital-ի վերլուծաբանների զեկույցում ԱՊՀ վեց երկրների՝ Ադրբեջանի, Հայաստանի, Վրաստանի, Ղազախստանի, Տաջիկստանի և Ուզբեկստանի տնտեսությունների վերաբերյալ։ «Հայաստանի տնտեսությունը մնացել է առաջատարը ԱՊՀ+ տարածաշրջանում՝ ստանալով օգուտ կայուն արտաքին ներհոսքերից (այդ թվում՝ Ռուսաստանից) և բարձր ներքին ակտիվությունից՝ դրամավարկային և ֆիսկալ քաղաքականության համադրության պահպանդմամբ», - նշվում է հետազոտության մեջ: Նշվում է նաև, որ տնտեսական ակտիվության ցուցանիշը, որն արտացոլում է հիմնական ճյուղերի դինամիկան, 2023 թվականին տարեկան կտրվածքով աճել է 9,4%-ով։ Բարձր աճ է գրանցվել շինարարության (+14,8%), առևտրի և այլ ծառայությունների ոլորտներում (համապատասխանաբար +25,7% և +10,3%)։ «Հայաստանը շարունակում է օգուտ ստանալ Ռուսաստանից ֆիզիկական անձանց և ընկերությունների տեղափոխումից և ֆինանսական ու առևտրային հոսքերի վերակողմնորոշումից: 2023 թվականին ապրանքների արտահանումն ու ներմուծումն աճել են 55%-ով և 40%-ով։ 2023 թվականի կեսերին Ռուսաստանից ստացվող դրամական փոխանցումները կայունացել են բարձր մակարդակի վրա (2021թ․–ի մակարդակից կրկնակի ավելի), թեև նախորդ տարվա գագաթնակետից ցածր», - նշում են վերլուծաբանները։ Թվեր և կանխատեսումներ Հայաստանի տնտեսության վերաբերյալ Հայաստանի տնտեսական աճը 2024 թվականի պետբյուջեում նախատեսված է 7 տոկոսի սահմանում։ Նախնական տվյալներով՝ Հայաստանի տնտեսական ակտիվության ցուցանիշը 2023 թվականին, 2022 թվականի հունվար-դեկտեմբերի համեմատ, աճել է 9,4 տոկոսով։ Կենտրոնական բանկի դեկտեմբերյան կանխատեսմամբ՝ այս տարի Հայաստանի տնտեսությունը կաճի 6,1 տոկոսով։ ԵԱԶԲ-ն Հայաստանի ՀՆԱ-ի աճը կանխատեսում է 5,7% 2024 թվականին և 5,3% 2025 թվականին։ Համաշխարհային բանկն ակնկալում է, որ 2024 թվականին Հայաստանի տնտեսությունը կաճի 4,7 տոկոսով, իսկ 2025 թվականին՝ 4,5 տոկոսով։ ԱՄՀ-ն 2024 թվականին Հայաստանի տնտեսության համար կանխատեսում է 5 տոկոս աճ։ Fitch Ratings գործակալության կանխատեսման համաձայն՝ 2024 թվականին Հայաստանի տնտեսության աճը կկազմի 6%, իսկ 2025 թվականին՝ 4,9%։ ՄԱԿ-ն ակնկալում է, որ 2024 թվականին Հայաստանի տնտեսական աճը կկազմի 5,2 տոկոս, իսկ 2025 թվականին՝ 4,8 տոկոս։