ՌԴ ֆիննախը հարթակ է պատրաստել ԵԱՏՄ երկրների ոսկերչական իրերի արտահանման համար Ռուսաստանի ֆինանսների նախարարությունը պատրաստել է ԵԱՏՄ երկրներ ոսկերչական իրերի արտահանման էլեկտրոնային հարթակի նախատիպը,- գրում է ejc.am-ը։ Այս մասին հայտարարել է ՌԴ ֆինանսների նախարարության ներկայացուցիչ Յուլիա Գոնչարենկոն ԵԱՏՄ երկրների թվային նախագծերի վերաբերյալ պանելային քննարկման ժամանակ։ Այն տեղի է ունենում Սոչիում` ԵԱՏՄ միջկառավարական խորհրդի նիստի շրջանակներում։ Քննարկման կազմակերպիչն է Եվրասիական զարգացման բանկի թվային նախաձեռնությունների հիմնադրամի ղեկավար Տիգրան Սարգսյանը: Ըստ Գոնչարենկոյի` Ռուսաստանը 2017 թվականին առաջարկել է թվայնացնել ոսկերչական իրերի, թանկարժեք մետաղների և քարերի շրջանառությունը։ Այժմ ազգային մակարդակով այդ հարցը ՌԴ-ում լուծված է, և հաստատվել է ինտեգրումը Բելառուսում ստեղծված նմանատիպ հարթակի հետ։ «Այդ ազգային պլատֆորմների հիման վրա կարելի է ստեղծել ընդհանուր եվրասիական հարթակ, որը թույլ կտա այնտեղ ցուցադրել ԵԱՏՄ բոլոր հանրապետությունների արտադրությունը և պրոֆեսիոնալ մարքեթոլոգների օգնությամբ ներկայացնել երրորդ երկրների շուկաներում», - հայտարարել է Գոնչարենկոն: Ռուսաստանի և Բելառուսի ֆինանսների նախարարությունները, ինչպես նաև Եվրասիական զարգացման բանկը արդեն մշակել են նման հարթակի կառուցվածքը։ Այժմ օրենսդրության մեջ լրացումներ կատարելու նախագծեր են կազմվում, որոնք անհրաժեշտ են նման առցանց վաճառքի համար: Ռուսաստանի ֆինանսների նախարարությունը առաջարկել է նաև այս տարի Հայաստանում անցկացնել եվրասիական ոսկերչական ցուցահանդես: «Ոսկերչական արդյունաբերությունը մեր երկրների մշակույթի մի մասն է։ Հայաստանում ոսկերչության շատ հին ավանդույթներ կան, և հուսով ենք, որ Հայաստանն այս տարի կընդունի մեզ, որպեսզի մենք կարողանանք ԵԱՏՄ-ում պատրաստված զարդերը ցույց տալ մասնակիցների լայն շրջանակին», - հավելել է նա։ Իր հերթին Սարգսյանը նշել է, որ թանկարժեք մետաղների և քարերի համաշխարհային արդյունահանման մեջ ԵԱՏՄ-ն զբաղեցնում է 30%-ը, իսկ պատրաստի արտադրանքի շուկայում՝ մոտ 1%-ը: Այստեղ հիմնական պահանջները` որպես կանոն, ուղղված էին ֆինանսների նախարարություններին, որոնք խստորեն կարգավորում էին վաճառքն այս ոլորտում՝ «ստվերային» տնտեսության դեմ պայքարելու համար: Բայց թվային տեխնոլոգիաները ցույց են տալիս, որ հնարավոր է պարզեցնել վերահսկողությունը՝ չկորցնելով դրա արդյունավետությունը, նշել է նա։ Ընդհանուր առմամբ, ԵԱՏՄ-ում գրեթե 6 000 ոսկերչական արտադրություն կա, որոնց շրջանառությունը 2022 թ. կազմել է մոտ 1,6 մլրդ դոլար։ Նշենք, որ Հայաստանում ոսկերչական իրերի արտադրությունը 2021 թվականին (այսինքն՝ դեռ ռուս-ուկրաինական հակամարտության սկսվելուց առաջ) 28 միլիոն դոլարից հասել է 74 միլիոն դոլարի (2022 թվականի տվյալները դեռ չեն հրապարակվել)։ Այդ թվում՝ դեպի Էմիրություններ արտահանումը կազմել է 24,6 մլն դոլար, Թուրքմենստան՝ 6,5 մլն դոլար, Ղազախստան՝ 2,6 մլն դոլար, ԱՄՆ՝ 35,1 մլն դոլար, Բելառուս՝ 1,8 մլն դոլար, Ռուսաստան՝ 1 մլն դոլարից մի փոքր պակաս։