Apple-ը և Goldman Sachs-ը մտադիր են ստեղծել աշխարհի ամենահզոր նեոբանկը

Apple-ը և Goldman Sachs Bank USA-ը միավորվել են՝ ստեղծելու ԱՄՆ-ում ամենահզոր ֆինթեքը,- գրում է fintech.am-ը։ Անցյալ շաբաթ աշխարհի ամենահզոր տեխնոլոգիական խաղացողներից մեկը՝ Apple-ը, ապշեցրել է ԱՄՆ բանկային ոլորտը նոր ֆինանսական պրոդուկտի՝ ավանդային հաշվի գործարկման մասին լուրերով: Apple-ը հայտարարել է, որ ավանդատուներին կառաջարկի տարեկան 4,15%՝ առանց դուրսբերման սահմանափակումների և ավանդների ապահովագրման դաշնային կորպորացիայի (FDIC) կողմից ավանդների երաշխիքների։ Apple-ը չունի բանկային լիցենզիա։ Ընկերությունը հանդես է գալիս որպես «ցուցափեղկ» Goldman Sachs Bank USA-ի համար, որն ունի լիցենզիա և ավանդների ապահովագրություն FDIC-ից: Ֆինթեք աշխարհի լեզվով ասած՝ Apple-ը Chime-ի, Revolut-ի և Monzo-ի նման նեոբանկ է: «Apple» ապրանքանիշի հզորությունն աշխարհում աննախադեպ է, հաշվի առնելով, որ մոլորակի ավելի քան 2 միլիարդ iPhone-ներն այժմ կառաջարկեն Goldman ծառայությունները։ Նոր պրոդուկտը հասանելի է միայն Apple Card-ի հաճախորդներին: