Philip Morris-ը նախատեսում է լքել Ռուսաստանը մինչև տարեվերջ Ծխախոտ արտադրող Philip Morris International-ը նախատեսում է դուրս գալ ռուսական շուկայից մինչև 2022 թվականի վերջը։ Այս մասին Bloomberg-ին տված հարցազրույցում հայտարարել է ընկերության տնօրեն Յացեկ Օլչակը։ Նրա խոսքով, ընկերությունը ջանքեր է գործադրում դադարեցնելու իր ներկայությունը Ռուսաստանում, սակայն չի կարծում, որ դա տեղի կունենա հաջորդ եռամսյակում, այլ ավելի շուտ ՝  մինչև տարեվերջ։ Օլչակը նշել է, որ Philip Morris-ը որոշել է լքել Ռուսաստանը մատակարարման շղթաների և բանկերի հետ ֆինանսական գործարքների հետ կապված դժվարությունների պատճառով։ Գործադիր տնօրենը հավելել է, որ ռուսական շուկան յոթերորդն է Philip Morris-ի համար և կազմում է ընկերության բիզնեսի 27%-ը։ Օրինակ՝ անցյալ տարի ռուսական շուկան ընկերությանը հասույթի 6 տոկոս է բերել։ Philip Morris International-ը բացել է իր առաջին ներկայացուցչությունը Ռուսաստանում 1992 թվականին և երկրում ունի ավելի քան 3200 աշխատակից: 2021 թվականին Ռուսաստանին բաժին է ընկել PMI-ի ընդհանուր ծխախոտի և տաքացվող ծխախոտի առաքումների գրեթե 10%-ը։ Մարտի 9-ին Philip Morris International-ը, ծխախոտ արտադրող այլ հսկաների հետ միասին, հայտարարեց Ռուսաստանի Դաշնությունում ծրագրված ներդրումների դադարեցման, այդ թվում ՝ նոր ապրանքների թողարկման մասին։ Մարտի 23-ին ընկերությունը որոշել է կրճատել արտադրությունը Ռուսաստանում։ Մասնավորապես, այն չեղյալ է հայտարարել 2022 թվականին Ռուսաստանում նախատեսված բոլոր ապրանքների վաճառքը, այդ թվում ՝ IQOS Iluma-ի ՝ ծխախոտի տաքացման առաջատար արտադրանքի թողարկումը, որը նախատեսվում էր սկսել մարտին: