2023թ. հունվար-սեպտեմբեր ամիսներին Հայաստանի բոլոր բանկերը 1000 խոշոր հարկատուների ցանկում են 2023թ. հունվար-սեպտեմբեր ամիսներին Հայաստանի բոլոր բանկերը, բացառությամբ «Արցախբանկի», հայտնվել են 1000 խոշոր հարկատուների ցանկում,- գրում է how2b.am-ը: Բանկերից 2-ը՝ «Ամերիաբանկ»-ը և «Արդշինբանկը» նույնիսկ տեղ են գտել 10 խոշոր հարկատուների թվում, և գրեթե բոլոր բանկերը ամենաշատ հարկ վճարած 100 ընկերությունների թվում են, բացառությամբ «Մելլաթ բանկ»-ի (258-րդ տեղ) և «Բիբլոս Բանկ Արմենիա»-ի (318): Հարկ է նշել, որ 2022թ. ամփոփ տվյալներով բանկերից միայն 9-ն էին խոշոր հարկատուների 100-յակում, իսկ ամենաշատ հարկ վճարած «Ամերիաբանկ»-ը 1000 հարկատուների ցանկում միայն 24-րդն էր: Եթե անդրադառնանք վճարած հարկերի չափին, ապա այս տարի ընդամենը 3 եռամսյակում առաջատար 4 բանկերը միասին վերցրած վճարել են մոտավորապես նույնքան հարկ, ինչքան նախորդ ամբողջ տարվա ընթացքում բոլոր բանկերը միասին վերցված՝ շուրջ 60 մլրդ դրամ: Միայն 2023թ. «Ամերիաբանկն» (22.8 մլրդ դրամ) ու «Արդշինբանկը» (21.3 մլրդ դրամ) եռապատկել են իրենց վճարած հարկերի քանակը՝ նախորդ ամբողջ տարվա նկատմամբ: Նախորդ ամբողջ տարվա համեմատ վճարած հարկերի գրեթե հնգապատիկ աճ է ապահովել «Էվոկաբանկը»՝ բյուջե մուտքագրելով 7,2 մլրդ դրամ հարկ: Վերջին տարվա ընթացքում Հայաստանի բանկային համակարգի թռիչքաձև աճը շարունակվում է, և այն արտացոլված էր նաև ավելի վաղ հրապարակված շահութաբերության ցուցանիշներում: