Կառավարությունը մտադիր է ՀԱԷԿ–ը շահագործել ևս 10 տարի Կառավարությունը մտադիր է Հայկական ատոմային էլեկտրակայանի 2-րդ էներգաբլոկի շահագործման ժամկետը երկարացնել 10 տարով` 2026թ–ից մինչև 2036թ.–ը: Փաստաթղթի համաձայն, ատոմակայանի շահագործման ժամկետը երկարացնելու որոշումն ընդունելուց հետո կառավարությունը կմշակի նաև աշխատանքային ծրագիր` անհրաժեշտ ֆինանսական միջոցների, ֆինանսավորման աղբյուրների ու կոնկրետ գործողությունների ներկայացմամբ: ԱԷԿ տնօրենի գլխավոր խորհրդական Գերա Սևիկյանը Sputnik Արմենիայի հետ զրույցում կառավարության որոշման նախագիծը անհրաժեշտ, բայց փոքր–ինչ ուշացած  է  որակել: Հիշեցնենք` ՀԱԷԿ 2-րդ էներգաբլոկի շահագործման նախագծային ժամկետն ավարտվել է 2016 թ-ին: Մինչև այդ` 2012թ. –ին կառավարությունը որոշում ընդունեց այն 10 տարով երկարացնելու մասին: Այդ նպատակով ՀԱԷԿ-ում իրականացվեցին մեծածավալ արդիականացման ու վերազինման աշխատանքներ, որոնց գերակշիռ մասի` մոտ 189 մլն դոլարի ֆինանսավորումը կատարվեց ՌԴ-ից ստացված վարկային և դրամաշնորհային միջոցներով: Ատոմակայանի տնօրենի խորհրդականը հայտնեց, որ ռուսական կողմը այս անգամ ևս առաջարկել է իր ֆինանսական ու մասնագիտական օգնությունը: Բայց Հայաստանը ռուսական կողմի առաջարկած արժեքի ու ժամանակացույցի հետ համաձայն չէ: Թե ինչ  ֆինասներով  է   նախագիծը  կյանքի  կոչվելու  դեռ  հայտնի  չէ: