ԵՄ-ն մտադրվել է Ռուսաստանի Դաշնության Կենտրոնական բանկի սառեցված ակտիվները փոխանցել Ուկրաինային․ Bloomberg

ԵՄ իրավաբան փորձագետները սկսել են մեխանիզմ մշակել Ռուսաստանի Բանկի սառեցված ակտիվները Կիև փոխանցելու համար։ Bloomberg-ի փոխանցմամբ ՝ նախատեսվում է արգելափակված 300 միլիարդ դոլարից միջոցների մի մասը փոխանցել Ուկրաինայի վերականգնման համար։ Ամերիկյան գործակալության զրուցակիցներից մեկը պարզաբանել է, որ դիտարկվում են միայն տարբերակներ, որոնք նախատեսում են Եվրոպայում սառեցված ակտիվների օգտագործում։ Հոկտեմբերի 27-ի դրությամբ, Եվրահանձնաժողովի տվյալներով, դա 17,5 միլիարդ եվրո է։ Ակտիվների մեծ մասն արգելափակվել է Գերմանիայում, Բելգիայում, Ֆրանսիայում, Լյուքսեմբուրգում, Իռլանդիայում, Իտալիայում և Ավստրիայում: Bloomberg-ի աղբյուրների համաձայն ՝ ակտիվների բռնագրավումը իրավական տեսանկյունից վիճելի հարց է, որոշում կարող է կայացվել երկար ժամանակ։ Նշվում է նաև, որ միջոցների սառեցումը ենթադրում է դրանց վերադարձ։ Գործակալությունը նշում է, որ ԱՄՆ-ը վախենում է Ռուսաստանի Կենտրոնական բանկի միջոցների բռնագրավումից, քանի որ նման գործողությունները կհանգեցնեն նրան, որ այլ երկրների Կենտրոնական բանկերը չեն ցանկանա իրենց ակտիվները պահել ԱՄՆ-ում։