Շրջանառության մեջ են դրվում Դրամի 30-ամյակին նվիրված մետաղադրամներ

ՀՀ կենտրոնական բանկը (ԿԲ) շրջանառության մեջ է դրել 10, 20, 50, 100, 200 եւ 500 դրամ անվանական արժեքով շրջանառու հիշատակային մետաղադրամներ՝ նվիրված ազգային արժույթի 30-ամյակին: ԿԲ-ից հայտնել են, որ մետաղադրամների դիմերեսներին պատկերված են ՀՀ ազգային դրամի 30-ամյակի պատկերանիշը, թողարկման տարեթիվը՝ 2023, «Հայաստանի Հանրապետություն» եւ «Republic of Armenia» մակագրությունները։ Դարձերեսներին մետաղադրամների անվանական արժեքներն են՝ «10 դրամ», «20 դրամ», «50 դրամ», «100 դրամ», «200 դրամ», «500 դրամ», ազգային զարդանախշեր: Մետաղադրամների էսքիզների հեղինակներն են Վարդան Վարդանյանը (դիմերեսներ) եւ Կարապետ Աբրահամյանը (դարձերեսներ): Մետաղադրամները հատվել են Մեծ Բրիտանիայի արքայական դրամահատարանում: Նշվում է, որ շրջանառու հիշատակային մետաղադրամները թողարկվել են սահմանափակ քանակով, շրջանառվում են սովորական մետաղադրամների հետ մեկտեղ եւ օրինական վճարամիջոց են իրենց անվանական արժեքով: