4 նոր որոշում, որոնց մասին պետք է իմանալ կառավարության այսօրվա նիստից հետո

1․ Կառավարությունը երկարացնում է ԱԱՀ–ից ազատման արտոնությունը էլեկտրամոբիլների ներմուծման դեպքում

Կառավարության հոկտեմբերի 16-ի նիստում ընդունվել է որոշում, որով էլեկտրամոբիլների ներմուծման դեպքում տնտեսվարողները ևս մեկ տարով՝ մինչև 2026 թվականի դեկտեմբերի 31-ը, կազատվեն ավելացված արժեքի հարկից (ԱԱՀ)։
Էկոնոմիկայի նախարար Գևորգ Պապոյանը ներկայացրեց, որ արտոնությունը կգործի բոլոր այն ավտոմեքենաների, ավտոբուսների, մոտոցիկլետների և մոպեդների համար, որոնք ունեն էլեկտրական շարժիչ։

Նախարարը նշեց, որ այս արտոնությունը գործում է դեռևս 2019 թվականից, իսկ դրական արդյունքների շնորհիվ՝ դրա ժամկետը կրկին երկարացվում է։
Բացի ԱԱՀ-ից ազատումից, 3-րդ երկրներից ներմուծման դեպքում գործում է նաև մաքսատուրքից ազատման արտոնություն։

Ըստ նախարարի՝ արտոնությունների շնորհիվ էլեկտրամոբիլների ներմուծման ծավալները շարունակել են աճել.

• 2023-ին ներմուծվել է 9,635 միավոր՝ 75% աճ 2022-ի համեմատ,

• 2024-ին՝ 11,793 միավոր, ինչը 22% աճ է,

• իսկ 2025-ի ընթացքում՝ մինչև հոկտեմբերի 17-ը՝ 14,888 միավոր, արդեն 3,000-ով ավելի, քան նախորդ ամբողջ տարում։

2․ Եկամուտների հայտարարագրումը դառնում է ավելի հեշտ և ավտոմատ

Ֆինանսների նախարարի տեղակալ Արման Պողոսյանը ներկայացրեց օրենսդրական փոփոխությունների փաթեթ, որի նպատակն է պարզեցնել քաղաքացիների եկամուտների հայտարարագրման գործընթացը։

Նախատեսվում է, որ Պետական եկամուտների կոմիտեն ինքնուրույն կձևավորի քաղաքացիների հայտարարագրերը՝ հիմնվելով արդեն առկա տվյալների վրա։
Քաղաքացիներին կտրվի ժամանակ՝ ստուգելու և անհրաժեշտության դեպքում փոփոխություններ կատարելու համար։
Եթե լրացումներ չլինեն, հայտարարագիրը ավտոմատ կերպով կհամարվի ներկայացված՝ հաջորդ տարվա հուլիսի 1-ին։

Փոփոխությունների այլ կետեր․

• Կվերացվի տուգանքը՝ հայտարարագիր չներկայացնելու համար, քանի որ գործընթացը դառնում է ավտոմատ։

• Սոցծախսերի վերադարձի իրավունք ունեցող քաղաքացիները պարտադիր պետք է մուտք գործեն համակարգ և հաստատեն հայտարարագիրը էլեկտրոնային ստորագրությամբ։

• Ընտանիքի անդամների միջև փոխանցվող գումարները՝ կենցաղային նպատակներով, չեն ենթարկվի հայտարարագրման։

• Հարկային մարմիններին բանկային տվյալները կփոխանցվեն միայն քաղաքացու համաձայնությամբ։

3․ Հոկտեմբերը՝ կրծքագեղձի քաղցկեղի իրազեկման ամիս

Առողջապահության նախարար Անահիտ Ավանեսյանը ներկայացրեց, որ հոկտեմբեր ամիսը Հայաստանում ևս նշվում է որպես կրծքագեղձի քաղցկեղի իրազեկման ամիս։
Երևանում և մարզերում մի շարք շենքեր լուսավորվում են խորհրդանշական գույնով՝ հիշեցնելով կանանց կանխարգելիչ հետազոտությունների կարևորության մասին։

Այս տարի պետությունը սկսել է սքրինինգային ընդլայնված ծրագիր, որով պետական պատվերով անվճար մամոգրաֆիկ հետազոտություններ են իրականացվում ուսուցիչների, բժիշկների, պետական ծառայողների, զինծառայողների ընտանիքների և սոցիալական այլ խմբերի համար։

Վարչապետ Փաշինյանը նշեց, որ անհրաժեշտ է հրապարակել վիճակագրություն՝ վաղ հայտնաբերման արդյունավետության վերաբերյալ։
Նախարար Ավանեսյանի խոսքով՝ 2023–2024 թթ. ընթացքում քաղցկեղից մահացության ցուցանիշները նվազել են, ինչը ցույց է տալիս, որ վաղ հայտնաբերման ծրագրերը տալիս են իրական արդյունք։

4․ Առողջության համապարփակ ապահովագրության ներդրման մանրամասները

Վարչապետ Նիկոլ Փաշինյանը հայտարարեց, որ առողջության համապարփակ ապահովագրության համակարգը կմեկնարկի 2026 թվականին և կիրականացվի 3 փուլով։
Այնուամենայնիվ, քաղաքացիների համար նախատեսված վճարների մի մասը կփոխհատուցվի Զինծառայողների ապահովագրության հիմնադրամին ուղղվող պարտադիր վճարների նվազեցման հաշվին։

Ապահովագրության ներդրման փուլերը

• 2026թ․ առաջին փուլ – կներառվեն մինչև 18 տարեկան երեխաները, 65 տարին լրացած անձինք, հաշմանդամություն ունեցող քաղաքացիները, անապահով ընտանիքները և բարձր եկամուտ ունեցող անձինք։

• 2027թ․ երկրորդ փուլ

• 2028թ․ երրորդ փուլ

Ապահովագրության տարեկան փաթեթը կկազմի 129,600 դրամ։

Փաշինյանի խոսքով՝ սկզբնական փուլում ապահովագրությունը կներառի Հայաստանում մատուցվող բժշկական ծառայությունների շուրջ 30 տոկոսը, որոնք ամենահաճախ հանդիպող հիվանդությունների բուժմանն են վերաբերում։