Գերմանիան հայտարարում է գազի և էլեկտրաէներգիայի գների հերթական բարձրացման մասին

Գերմանիայի էներգիայի և ջրամատակարարման ընկերությունների դաշնային ասոցիացիան (BDEW) նախազգուշացրել է առաջիկա մի քանի ամիսների ընթացքում երկրում գազի և էլեկտրաէներգիայի գների հետագա բարձրացման մասին։ Այս մասին հայտնում է DPA-ն ՝ հղում անելով BDEW-ի ղեկավար Քերսթին Անդրեային։ BDEW-ի ղեկավարը նշել է, որ 2022 թվականին փոքր և միջին ձեռնարկությունները էլեկտրաէներգիայի համար ստիպված կլինեն միջինը 50 տոկոսով ավելի վճարել, քան նախորդ տարի։ Իսկ սովորական գազասպառողները կվճարեն երկու անգամ ավելի, քան 2021թ.: Նրա խոսքով, սակագները բարձրացել են չափազանց բարձր մեծածախ գների պատճառով։ Օրինակ, էլեկտրաէներգիայի մեծածախ գները քառապատկվել են, իսկ գազի գները գրեթե հնգապատկվել են 2021 թվականի սկզբից: Նա հավելել է, որ եթե բարձր գները երկար պահպանվեն, ապա դրանք ավելի ու ավելի կարտացոլվեն սակագների վրա։ Բացի այդ, Ուկրաինայում Ռուսաստանի հատուկ գործողության մեկնարկից հետո վատթարացել է երկրի էներգետիկ շուկայի վիճակը։ Տարեսկզբից սպառողների համար էլեկտրաէներգիայի միջին սակագինը 2021 թվականի միջինի համեմատ արդեն աճել է 15,5%-ով։   Մայիսի 5-ին Գերմանիայի էկոնոմիկայի նախարար Ռոբերտ Հաբեկը հայտարարել էր, որ Գերմանիայի քաղաքացիները պետք է պատրաստվեն շարունակական գների բարձրացմանը և բարեկեցության հետագա կորուստներին, չնայած այն հանգամանքին, որ Գերմանիայի կառավարությունը սկսել է աջակցության տարբեր ծրագրեր ՝ ուղղված իրացվելիության ապահովմանը և ընկերությունների դիրքերը պահպանելուն։