2023թ. հունվար – նոյեմբերին ՀՀ վարկային կազմակերպությունների կողմից տրամադրված վարկերի ծավալը նվազել է 6.59%-ով

ՀՀ կենտրոնական բանկի հրապարակած տվյալների համաձայն Հայաստանում գործող  վարկային կազմակերպությունները 2023թ. 11 ամիսներին տրամադրել են շուրջ 3.15 տրլն դրամի վարկեր։ 2022թ.-ի համադրելի ցուցանիշի համեմատ արձանագրվել է նվազում 6.59%-ով կամ 222.37 մլրդ դրամով։ ՀՀ-ում գործող վարկային կազմակերպությունների կողմից 2023թ. հունվար-նոյեմբեր ամիսներին տրամադրված վարկերից 912.9 մլրդ դրամը կամ 28.98%-ը բաժին է ընկնում արտարժույթով վարկերին, համապատասխանաբար, դրամով վարկերին բաժին է ընկնում 2,237 մլրդ դրամ կամ 71.02%։ Ռեզիդենտներին տրված վարկերի ծավալը 3,009.9 մլրդ դրամ է, որից 773.7 մլրդ դրամն արտարժույթով և 2,236.2 մլրդ՝ ՀՀ դրամով։ Ոչ ռեզիդենտներին տրամադրվել է 140.05 մլրդ դրամ վարկ, որից 780 մլն՝ դրամով, իսկ 139.27 մլրդ՝ արտարժույթով։ Ռեզիդենտներին տրամադրված վարկերից 1,246 մլրդ դրամը հատկացվել է ձեռնարկություններին (դրամով՝ 695.4 մլրդ, արտարժույթով՝ 550.11 մլրդ)։ Ձեռնարկություններին տրամադրված վարկերից 1,245.5 մլրդ դրամը հատկացվել է մասնավոր կազմակերպություններին, իսկ 496 մլն դրամը՝ պետական։ Տնային տնտեսություններին տրամադրվել է 1,757.4 մլրդ դրամ ծավալով վարկ (դրամով՝ 1,536.6 մլրդն դրամ, արտարժույթով՝ 220.79 մլրդ դրամ)։ Շահույթ չհետապնդող կազմակերպություններին հատկացվել է 6.12 մլրդ դրամ, իսկ ֆինանսական կազմակերպություններին՝ 340 մլն դրամ վարկ։