Հայաստանում ֆինանսական ծառայություններն ավելի հասանելի կլինեն. ԿԲ Կենտրոնական բանկը (ԿԲ) վերանայել է ֆինանսական ծառայություններ մատուցող ինքնասպասարկման սարքերի շահագործման կարգը․ կանոնների վրա հիմնված կարգավորումից անցում է կատարվել սկզբունքների վրա հիմնված կարգավորման: ԿԲ-ից հայտնել են, որ ֆինանսական կազմակերպություններն այսուհետ կարող են ինքնասպասարկման սարքերի միջոցով մատուցել իրենց լիցենզիայով թույլատրված բոլոր ֆինանսական գործառնությունները՝ պահպանելով ԿԲ սահմանած սկզբունքները: «Այս փոփոխությունները սպառողներին հնարավորություն կտան շուրջօրյա եւ հասանելի վայրերում օգտվելու ինքնասպասարկման սարքերի միջոցով առաջարկվող ծառայությունների ընդլայնված շարքից՝ առանց ֆինանսական կազմակերպությունների մասնաճյուղեր այցելելու անհրաժեշտության։ Փոփոխություններով հնարավորություն է ընձեռվել բանկերին տեղադրել բազմաֆունկցիոնալ ինքնասպասարկման սարքեր բանկի գլխամասի եւ մասնաճյուղերի տարածքից դուրս գտնվող այլ վայրերում եւս։ Վարկային կազմակերպությունները եւ փոխանակման կետերը ինքնասպասարկման սարքերով կկարողանան մատուցել իրենց լիցենզիայով նախատեսված ծառայությունները: Վճարահաշվարկային կազմակերպություններին թույլատրվել է բանկերի կամ այլ ֆինանսական կազմակերպությունների հետ համագործակցությամբ իրականացնել կանխիկի տրամադրման ծառայություններ, եթե վճարահաշվարկային կազմակերպությունների կողմից շահագործվող սարքերն ունեն համապատասխան տեխնիկական եւ ծրագրային հնարավորություններ»,- ասված է ԿԲ հաղորդագրությունում: