ՊԵԿ-ը գործարկել է «Էլեկտրոնային հաշվարկային փաստաթղթեր» նոր համակարգը Հունիսի 1-ից գործարկվել է «Էլեկտրոնային հաշվարկային փաստաթղթեր» (e-invoicing) նոր համակարգը,- գրում է banks.am-ը։ Համակարգ հնարավոր է մուտք գործել ՀՀ ՊԵԿ Հաշվետվությունների ներկայացման էլեկտրոնային համակարգի (file-online.taxservice.am) միջոցով։ Պետական եկամուտների կոմիտեն (ՊԵԿ) տեղեկացնում է, որ նոր համակարգով դուրս գրված հաշվարկային փաստաթղթերն իրական ժամանակում գրանցվելու են հարկային մարմնի հաշվարկային փաստաթղթերի համակարգում (տեղեկատվական շտեմարանում)։ Նախկին` «Էլեկտրոնային հաշվարկային փաստաթղթեր եւ գրքեր» (e-invoicing) համակարգը որոշակի ժամանակահատված շարունակելու է գործարկվել։ Միաժամանակ, հաշվարկային փաստաթղթերը կարող են դուրս գրվել ինչպես նախկին համակարգով, այնպես էլ նոր համակարգով։ «Եթե նույն գործարքին վերաբերող հաշվարկային փաստաթուղթը դուրս գրվի եւ՛ նախկին, եւ՛ նոր համակարգով, ապա գործարքը կփաստաթղթավորվի կրկնակի, ուստի, դրանից խուսափելու նպատակով առաջարկվում է գործարքը փաստաթղթավորել (այսինքն` հաշվարկային փաստաթուղթը դուրս գրել) կա՛մ նախկին համակարգով, կա՛մ նոր համակարգով»,- ասված է ՊԵԿ հաղորդագրությունում: