Apple-ի համահիմնադիրը զգուշացնում է արհեստական ​​բանականության վտանգների մասին ChatGPT-ի նման արհեստական բանականության գեներատիվ նեյրոցանցերի տարածումը հղի է բազմաթիվ ռիսկերով: Մասնավորապես, ԱԲ-ն կարող է դժվարացնել խարդախության և ապատեղեկատվության հայտնաբերումը: BBC-ին տված հարցազրույցում նման կարծիք է հայտնել Apple-ի համահիմնադիր Սթիվ Վոզնյակը,- գրում է News.am Tech-ը։ «ԱԲ-ն այնքան խելացի է, որ այն բաց է խաբեբաների համար՝ նրանց, ովքեր ցանկանում են խաբել ձեզ՝ ներկայանալով ուրիշների փոխարեն»,- ասել է Վոզնյակը: Նրա խոսքով՝ ԱԲ-ի լավն այն է, որ այն կարող է ստեղծել տեքստ, որը «իրոք խելացի է թվում» և կարող է անել շատ բաներ, որոնք անցյալում մարդիկ են անում: Սակայն մարդկանց հետ շփվելու ԱԲ-ի թույլ կողմը, ըստ Վոզնյակի, հույզերն են: Հենց հույզերի բացակայության պատճառով է, որ նեյրոցանցերը, ըստ նրա, երբեք չեն փոխարինի մարդուն։ ԱԲ-ն ավելի անվտանգ տեխնոլոգիա դարձնելու համար կառավարությունը պետք է պատասխանատվություն սահմանի ալգորիթմների կողմից ստեղծված կեղծիքների հրապարակման համար: ՏՏ հսկաները նույնպես պետք է պատասխանատվություն կրեն խնդիրների և հետևանքների համար։ Միաժամանակ Վոզնյակը կասկածում է, որ կարգավորող մարմիններն ամեն ինչ ճիշտ են անում հիմա։ «Կարծում եմ, որ այն ուժերը, որոնք փողի հետևից են ընկած, սովորաբար հաղթում են, ինչը բավականին տխուր է»,- ասաց Վոզնյակը: Հիշեցնենք, որ Իլոն Մասկի և ԱԲ մշակման ոլորտում աշխատող բազմաթիվ փորձագետների հետ միասին Սթիվ Վոզնյակը ևս ստորագրել է բաց նամակը, որով կոչ է արվում կասեցնել առաջադեմ ԱԲ-ի զարգացումը։ ԱԲ չափազանց արագ զարգացման մեջ փորձագետները ժամանակակից հասարակության համար լուրջ ռիսկեր են տեսնում: