Zeekr-ը արգելափակելու է արտասահման արտահանված մեքենաները. ՀՀ-ում անհանգստանալու պատճառ չկա Չինական Zeekr ընկերությունը հայտարարում է, որ կսկսի բլոկավորել Չինաստանից անօրինական կերպով արտահանված մեքենաները, որոնք նախատեսված էին միայն չինական շուկայի համար։ Այս մասին հայտնում է Tengri Auto-ն՝ հղում անելով ZEEKR International-ի ներկայացուցիչների հետ ունեցած զրույցին։ ZEEKR International-ի ներկայացուցիչը հաստատել է, որ խոսքը վերաբերում է միայն 2024 թվականի հուլիսի 15-ից հետո արտադրված մեքենաներին։ Եթե ընկերությունը հայտնաբերի, որ այս մեքենաները գտնվում են պայմանագրում նշված սպասարկման տարածքից դուրս կամ օգտագործում են չարտոնված ՍԻՄ քարտեր, մեքենայի համակարգը նախազգուշացում կտա և կառաջարկի վերադարձնել մեքենան Չինաստանի տարածք։ Պահանջը անտեսելու դեպքում Zeekr-ը հեռակա կարգով կանջատի մեքենայի ֆունկցիոնալությունը՝ արգելափակելով մուլտիմեդիա համակարգը և էկրանը։ Վերջերս մամուլում տարածված ZEEKR էլեկտրական մեքենաների արգելափակման լուրի կապակցությամբ հայտնում ենք, որ ՀՀ-ում ZEEKR-ի պաշտոնական ներկայացուցիչ ՄՈՒՐԱՆ ընկերությունից գնված մեքենաների սեփականատերերին որևէ խնդիր չի սպառնում։ Մեքենաները վաճառվել են պաշտոնական գործարանային երաշխիքով և չունեն որևէ խնդիր ծրագրային ապահովման, պահեստամասերի կամ սպասարկման հետ կապված։ Այս միջոցները ձեռնարկվել են հաճախորդների անվտանգության ապահովման նպատակով և տեղական օրենքներին ու պահանջներին համապատասխանելու համար։