Հայ բիզնեսները կանգնած են նոր ճգնաժամերի առաջ. գործեք հիմա, ոչ թե հետո Ինչպես պաշտպանել բիզնեսդ գլոբալ անորոշությունների ժամանակ․ ԱՄՆ նախկին ՊՆ փոխնախարարի խորհուրդները գործարարներին Տեխնոլոգիական առաջընթացը, աշխարհաքաղաքական հակամարտությունները, մատակարարման շղթաների խաթարումը և տնտեսական անորոշությունները ավելի ու ավելի են ճնշում աշխարհի խոշորագույն բիզնեսներին։ Սակայն ի՞նչ պետք է անի ձեռնարկատերը՝ այս փոթորկալից գլոբալ ֆոնին։ Այս հարցի պատասխանը տվել է ԱՄՆ պաշտպանության նախկին փոխնախարար, WestExec Advisors-ի համահիմնադիր Միշել Ֆլուրնոյը՝ McKinsey & Company-ի հետ զրույցում։ Նրա ներկայացրած մոտեցումները կարող են կենսական լինել նաև հայկական բիզնեսների համար, որոնք ցանկանում են դիմակայել արտաքին ցնցումներին ու պահպանել մրցունակությունը։
  1. մի վախեցիր ռիսկերից․ վերլուծիր դրանք
«Շատ ղեկավարներ միայն ներքին բիզնես գործոնների վրա են կենտրոնանում՝ մոռանալով աշխարհաքաղաքական միջավայրը։ Բայց հենց վերջինս կարող է որոշիչ դառնալ», ընդգծում է Ֆլուրնոյը։ Հայաստանում բիզնեսներ ունենալը նույնպես ենթադրում է տարածաշրջանային լարվածության ու միջազգային քաղաքականության մշտական ազդեցություն։ Առանց ռիսկերի քարտեզի ու հնարավոր ազդեցությունների գնահատման՝ հնարավոր չէ կայուն բիզնես կառուցել։
  1. պատրաստ եղիր սցենարների․ նախապես պատկերացրու վատագույնը
Ֆլուրնոյի առաջարկած հիմնական գործիքը՝ սցենարային պլանավորումն է։ Կազմակերպությունները պետք է ոչ միայն սպասեն ճգնաժամերին, այլև նախապես պատրաստեն պլաններ՝ տարբեր սցենարների դեպքում գործելու համար։ Հայաստանում, որտեղ ցանկացած փոփոխություն՝ մաքսային, սահմանային կամ էներգետիկ, կարող է անմիջապես անդրադառնալ բիզնեսի վրա, սա արդեն անհրաժեշտություն է։
  1. ուժեղացնել ղեկավարության ներգրավվածությունը ռիսկերի հարցում
«Անհրաժեշտ է, որ ռիսկերի կառավարման հարցերը լինեն ղեկավարության օրակարգում, ոչ թե միայն միջին օղակների պատասխանատվության դաշտում», նշում է Ֆլուրնոյը։ Համատեքստը պարզ է․ ռիսկերի մասին մտածել միայն ֆինանսական կամ իրավական թիմերում այլևս բավարար չէ։ Տնօրեններն ու հիմնադիրները պետք է անձամբ լինեն ներգրավված ռիսկերի վերլուծության և պատասխան քայլերի մշակման հարցում։
  1. կայունությունը որպես մրցակցային առավելություն
Աշխարհում ավելի ու ավելի շատ են գնահատում այն ընկերություններին, որոնք ունեն լավ մշակված ճգնաժամային պատասխան, կարողություն արագ ադապտացվելու և տարբեր շուկաներում արդյունավետ գործելու։ Ֆլուրնոյը նշում է՝ կայուն բիզնեսը դառնում է վստահության խորհրդանիշ՝ թե՛ ներդրողների, թե՛ գործընկերների համար։
  1. մարդու կապիտալը՝ որպես ռազմավարական հիմք
Ի տարբերություն տարածված կարծիքի՝ աշխարհաքաղաքական կայունությունը միայն լոգիստիկ կամ մատակարարման շղթաների խնդիր չէ։ Դա նաև մարդկանց խնդիր է՝ ինչպես պատրաստել թիմին անորոշությունների համար, ինչպես զարգացնել այնպիսի հմտություններ, որոնք թույլ կտան հաղթահարել ճնշումը։ Հենց այստեղ են սկսվում հայկական բիզնեսների վերափոխման հնարավորությունները։ *** Այսօր հաջողակ են լինելու այն բիզնեսները, որոնք ոչ թե «միայն հարմարվում են» փոփոխություններին, այլ ակտիվորեն պատրաստվում են դրանց՝ որպես անբաժան մաս ռազմավարությունից։ Միշել Ֆլուրնոյիի խորհուրդները, թեև ծնվել են ամերիկյան փորձից, ամբողջությամբ կիրառելի են նաև հայկական իրականության մեջ։ Գլոբալ անորոշությունների ու փոփոխվող աշխարհակարգի պայմաններում դիմակայունությունն արդեն ընտրություն չէ։ Այն նոր ստանդարտ է։   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: