3 օրում Հայաստանում բացահայտվել է 268 հանցագործություն

Այս ընթացքում հայտնաբերվել է 23 հետախուզվող, որոնցից 4-ը կամավոր ներկայացել են իրավապահներին։

Մարտի 20-23-ը Հայաստանի Հանրապետությունում բացահայտվել է 268 հանցագործություն, որոնցից 9-ը՝ նախկինում կատարված։ Այս մասին հայտնում են ՆԳՆ ոստիկանությունից։

Ամենաշատ գրանցված դեպքերը վերաբերում են տրանսպորտային միջոց վարելու իրավունք չունեցող կամ զրկված անձանց կողմից մեքենա վարելուն՝ 54 դեպք։

Նշված ժամանակահատվածում արձանագրվել է նաև 38 դեպք թմրանյութի հայտնաբերման, 25 դեպք ֆիզիկական ներգործության և 23 դեպք մարմնական վնասվածք պատճառելու։

Բացի այդ, գրանցվել է 22 դեպք խարդախության, 12 դեպք անձնական ունեցվածքի գողության և 11 դեպք սառը զենքի հայտնաբերման։

Իրավապահները բացահայտել են նաև խուլիգանության, գույքի վնասման, փաստաթղթերի կեղծման, ապօրինի ծառահատման և այլ հանցագործություններ։

Նախկինում կատարված հանցագործություններից բացահայտվել են խարդախության և գողության դեպքեր, ինչպես նաև մեկ սպանության դեպք։

Այս ընթացքում հայտնաբերվել է 23 հետախուզվող, որոնցից 4-ը կամավոր ներկայացել են իրավապահներին։

Բացի այդ, հայտնաբերվել է 2 անհետ կորած անձ։

Արձանագրվել է նաև զենք-զինամթերքի կամավոր հանձնելու 7 դեպք։

Ճանապարհատրանսպորտային պատահարների առումով՝ 3 օրում գրանցվել է 36 ավտովթար, որոնց հետևանքով զոհվել է 2 մարդ, իսկ 47-ը ստացել են տարբեր աստիճանի մարմնական վնասվածքներ։