Անցնող շաբաթվա այլ կարևոր իրադարձությունները ֆինանսական շուկաների համար

ԱՄՆ Դաշնային պահուստային համակարգն առաջիկա շաբաթվա ընթացքում կայանալիք նիստի ընթացքում հավանաբար անփոփոխ կթողնի վերաֆինանսավորման տոկոսադրույքը՝ 4.25-4.5%: ԴՊՀ-ի պաշտոնյաների համոզմամբ գնաճը կշարունակի կայուն տեմպով շարժվել դեպի թիրախային 2% ցուցանիշը՝ միաժամանակ պահպանելով գործազրկության ցածր մակարդակը և շարունակելով տնտեսական աճի տեմպը։ ԱՄՆ սպառողների վստահության ինդեքսը հունվարին վերջին վեց ամիսների ընթացքում առաջին անգամ նվազել է՝ աշխատաշուկայի վերաբերյալ մտահոգությունների և Թրամփի վարչակազմի կողմից պլանավորված ներմուծման մաքսատուրքերի նոր քաղաքականության արդյունքում հնարավոր բարձր գնաճի սպասումների ֆոնին։ Ճապոնիայի կենտրոնական բանկը բարձրացրել է վերաֆինանսավորման տոկոսադրույքը 25 բազիսային կետով՝ սահմանելով 0.5%, ինչն ամենաբարձր մակարդակն է 2008թ.-ի համաշխարհային ֆինանսական ճգնաժամից ի վեր։  Թուրքիայի կենտրոնական բանկը կրճատել է վերաֆինանսավորման տոկոսադրույքը 2.5 տոկոսային կետով և սահմանել 45%՝ շարունակելով քաղաքականության մեղմացման ցիկլը։ Թուրքիայում գնաճը շարունակվում է զգալիորեն գերազանցել թիրախային 5% ցուցանիշը և դեկտեմբերին կազմել է 44.38%, իսկ 2024թ.-ի մայիսին այն հասել էր 75% առավելագույն ցուցանիշին։ ՌԴ պետական բյուջերի պակասուրդը 2024թ.-ին արդեն երրորդ տարին անընդմեջ գերազանցում է 3 տրիլիոն ռուբլին։ Երկրի ֆինանսների նախարարությունից հայտնել են, որ բյուջերի պակասուրդը կազմել է 3.49 տրիլիոն ռուբլի (34.4 միլիարդ դոլար), բյուջեի եկամուտներն ավելացել են 26%-ով, ծախսերը՝ 24.4%-ով։ finarm.am   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: