Անցնող շաբաթվա այլ կարևոր իրադարձությունները ֆինանսական շուկաների համար Նախորդ շաբաթ բաժնետոմսերի ֆոնդերը վերջին 6 շաբաթների ընթացքում առաջին անգամ 9.4 միլիարդ դոլարի արտահոսք են գրանցել, ինչը պայմանավորված է Moody’s-ի կողմից ԱՄՆ պետական վարկանիշը նվազեցնելուց հետո պետական պարտատոմսերի եկամտաբերության աճով։ Եվրահանձնաժողովը հայտարարել է, որ այս և հաջորդ տարի Եվրագոտու տնտեսությունն ավելի դանդաղ կաճի, քան նախապես կանխատեսվում էր՝ պայմանավորված ԱՄՆ-ի հետ սկսված «առևտրային պատերազմով»։ ՀՆԱ-ի աճի կանխատեսվող ցուցանիշը 2025թ.-ի համար ընդամենը 0.9% է՝ ի տարբերություն նախկինում կանխատեսված 1.3%-ի։ ԱՄՆ արդյունաբերության և ծառայությունների ոլորտի համախառն PMI ինդեքսը մայիսին աճել է մինչև 52.1՝ ապրիլին գրանցված 50.6-ից հետո։ Ցուցանիշի՝ 50-ից բարձր արժեքը նշանակում է գործարար ակտիվության բարձրացում, ինչը կապված է Վաշինգտոնի և Չինաստանի միջև «առևտրային պատերազմի» ժամանակավոր դադարի հետ։ Ճապոնիայում գնաճն ապրիլ ամսին տարեկան կտրվածքով կազմել է 3.5%՝ գրանցելով վերջին 2 տարիների առավելագույն ցուցանիշը։ Գնաճի տեմպի արագացումը հիմնականում պայմանավորված է սննդամթերքի գների աճով, ինչը ենթադրում է, որ տարեվերջին Ճապոնիայի բանկը վերաֆինանսավորման տոկոսադրույքի ևս մեկ բարձրացում կիրականացնի։ Չինաստանի ժողովրդական բանկը հոկտեմբեր ամսից ի վեր առաջին անգամ կրճատել է ուղենիշային վարկավորման տոկոսադրույքները 10 բազիսային կետով, իսկ խոշոր պետական բանկերը նվազեցրել են ավանդների տոկոսադրույքները։ Մեկ տարի ժամկետով վարկավորման ուղենիշային տոկոսադրույքը (LPR) սահմանվել է 3.0%, իսկ հինգ տարեկան LPR-ը՝ 3.5%։ finarm.am   Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: