24 համայնքում 26 սուբվենցիոն ծրագիր. Կառավարությունը կհատկացնի 1 մլրդ 582 մլն դրամ

Կառավարությունն իր այսօրվա՝ հոկտեմբերի 9–ի նիստում հաստատեց «Հայաստանի Հանրապետության 2025 թվականի պետական բյուջեի մասին» Հայաստանի Հանրապետության օրենքում և Հայաստանի Հանրապետության կառավարության 2024 թվականի դեկտեմբերի 27-ի N 2060-Ն որոշման մեջ փոփոխություններ և լրացումներ կատարելու մասին որոշման նախագիծը:

Տարածքային կառավարման և ենթակառուցվածքների նախարարի տեղակալ Արմեն Սիմոնյանը նշեց. «Ձեր քննարկմանն է ներկայացվում ՀՀ համայնքների ենթակառուցվածքների զարգացմանն ուղղված սուբվենցիոն ծրագրերը 2025-ի պետական բյուջեից համաֆինանսավորման նպատակով մարզպետների աշխատակազմերին 1 մլրդ 582 մլն 206 հազար դրամ հատկացնելու վերաբերյալ որոշման նախագիծը»:

Նախագծով առաջարկվում է համաֆինանսավորել 24 համայնքի 26 սուբվենցիոն ծրագրեր: Ըստ մարզերի բաշխվածությունը հետևյալն է.

Արագածոտնի մարզի 2 ծրագիր՝ 153.7 մլն դրամ

Արարատի մարզի 2 ծրագիր՝ 210.9 մլն դրամ

Արմավիրի մարզի 6 ծրագիր՝ 199.6 մլն դրամ

Գեղարքունիքի մարզի 3 ծրագիր՝ 125.9 մլն դրամ

Լոռու մարզի 2 ծրագիր՝ 192.8 մլն դրամ

Կոտայքի մարզի 1 ծրագիր՝ 25 մլն դրամ

Շիրակի մարզի 2 ծրագիր՝ 158.5 մլն դրամ

Սյունիքի մարզի 2 ծրագիր՝ 186 մլն դրամ

Վայոց ձորի մարզի 4 ծրագիր՝ 263.8 մլն դրամ

Տավուշի մարզի 2 ծրագիր՝ 66 մլն դրամ

«Ցանկանում եմ նշել, որ սույն որոշման հաստատմամբ կունենանք 2025 թվականի պետական բյուջեից 14.9 մլրդ դրամի համաֆինանսավորված սուբվենցիոն ծրագրեր»,- ասաց փոխնախարարը: