Հայ-ռուսական ինտենսիվացած շփումներ. ո՞րն է օրակարգը

Հայաստանի և Ռուսաստանի միջև բարձր մակարդակի շփումները վերջին շրջանում ինտենսիվացել են: Դա պայմանավորված է ոչ միայն հայ-ռուսական երկկողմ օրակարգով, այլ նաև տարածաշրջանային իրավիճակով՝ իսկ ավելի ստույգ Հայաստանի և Արցախի շուրջ տեղի ունեցող զարգացումներով, որոնք գնալով սրընթաց բնույթ են ստանում: Արդեն տևական ժամանակ է Ռուսաստանն ու Արևմուտքը մրցավազքի մեջ են հայ-ադրբեջանական գործընթացի առանցքային հարցերում միջնորդության համար, քանի որ դա կարող է կանխորոշիչ լինել Հարավային Կովկասում իրենց հետագա ներկայացվածության և ազդեցության համար: Արդյունքում և՛ Ռուսաստանում, և՛ արևմուտքում, ի դեմս ԵՄ-ի և ԱՄՆ-ի, բավականին զգայուն են հակառակ կողմի միջնորդությամբ տեղի ունեցող գործընթացների նկատմամբ։ Ռուսաստան-Արևմուտք սրված հարաբերությունների շարունակման պարագայում Հարավային Կովկասում ուժային կենտրոնների մրցակցությունը կարող է լուրջ հետևանքներ ունենալ Հայաստանի և Արցախի համար, քանի որ բացի բլիթներից և՛ Ռուսաստանը, և՛ Արևմուտքը կարող է կիրառել նաև մտրակների քաղաքականություն։