Ինչպե՞ս պաշտպանվել գնաճից

«Գնաճ» տերմինը մեզանից շատերի համար հասկանալի է, քանի որ դա այն է, ինչին մենք անշուշտ հանդիպում ենք տարբեր տեղեկատվական ռեսուրսներում, երբ խոսվում է գների մակարդակի բարձրացման մասին: Ապրանքների և ծառայությունների ինքնարժեքի հարցը վերաբերում է բոլորին, և այն չի կարելի անտեսել։ Պետության տնտեսության համար գների աճն, ըստ էության, կործանարար չէ և նույնիսկ անհրաժեշտ է: Չափավոր գնաճը (1–2%) խթանում է արտադրությունը։ Սակայն այս ցուցանիշը հաճախ գերազանցվում է և բացասաբար է անդրադառնում ինչպես տնտեսության, այնպես էլ մարդկանց կյանքի վրա։ Մասնավորապես, այն խժռում է ավանդատուների դեպոզիտների մասով եկամուտները, նվազեցնում կենսաթոշակառուների կենսամակարդակը, ուժեղացնում է սոցիալական շերտավորումը։ Այս դպեւքոմ ինչպե՞ս կարելի է պաշտպանվել գնաճից։ Առաջարկենք մի քանի քայլ Հաշվի առնելով այն հանգամանքը, որ առանձին մարդու սպառողական զամբյուղը տարբերվում է վիճակագրական միջինից, փորձագետները խորհուրդ են տալիս առաջին հերթին հաշվարկել անձնական գնաճը։ Այս կերպ կարող եք գնահատել, թե ինչպես է գների ընդհանուր աճն ազդում ձեր ֆինանսական վիճակի վրա: Դրա համար վերլուծեք այս և նախորդ տարվա նույն ժամանակահատվածների ծախսերը: Դուք կարող եք վերահսկել իրավիճակն ավելի կարճ ժամանակահատվածներում՝ չմոռանալով սեզոնների առանձնահատկությունների մասին: Օրինակ ամառային ու ձմեռային ամիսները համեմատելն անարդյունավետ է։ Կարևոր է հաշվարկել այն ապրանքների արժեքը, որոնք նախորդ ժամանակաշրջանից մնացել են ձեր սպառողական զամբյուղում: Եթե ​​դադարել եք այցելել ֆիթնես ակումբ, ապա բաժանորդագրության թանկացումը նշանակություն չունի։ Մի քանի տարին մեկ արված միանվագ ծախսերը նույնպես կարելի է բացառել։ Պետք է ուշադրություն դարձնել կանոնավոր ծախսերին՝ մթերք, հագուստ, կոմունալ վճարումներ։ Քանի դեռ բյուջեն չեք հաշվարկում, դժվար է ճշգրիտ գնահատել սննդի և զվարճանքի համար նախատեսված փոփոխական ծախսերը: Բայց, ամենայն հավանականությամբ, դուք անմիջապես կնկատեք սուրճի (որը միշտ գնում եք), կամ ձեր սիրելի կինոթատրոնի տոմսերի թանկացումը։ Անձնական գնաճի մոտավոր հաշվարկի բանաձևը հետևյալն է. (Ընթացիկ ժամանակաշրջանի զամբյուղի արժեքը / նախորդ շրջանի զամբյուղի արժեքով - 1) * 100%: Օպտիմալացրեք ծախսերը Եթե ​​անձնական գնաճը բարձր է, կարող եք, հենվելով ծախսերի պատկերի վրա, փոխել ֆինանսական սովորությունները։

• Փորձեք գնումներ կատարել այն խանութներից, որոնք առաջարկում են ավելի ցածր գներ և զեղչեր: Ամենայն հավանականությամբ, ցանցային սուպերմարկետում առկա են նույն ապրանքները, որոնց համար սովորաբար գնում եք թանկարժեք խանութ: Կարող եք նաև նմանատիպ ապրանքներ փնտրել, իսկ երբեմն ավելի ձեռնտու է առցանց պատվերներ կատարել, քանի որ դրանք ուղեկցվում են զեղչերով և բոնուսներով։
• Մտածեք, թե որքան է սկզբունքային ձեզ համար գնել հայտնի ապրանքանիշերի իրեր և սարքավորումներ: Հաճախ մարդիկ չեն վերլուծում ապրանքների և վաճառողների առաջարկների պարամետրերը, այլ առաջնորդվում են միայն արտադրողի անունով:
• Նախապես դասավորեք ձեր զգեստապահարանը և հագուստ ու կոշիկ գնեք ոչ թե սեզոնին, այլ զեղչերի ժամանակ։
• Եթե դուք պարբերաբար օգտվում եք որոշ ծառայություններից, օրինակ՝ գնում եք լողավազան կամ թանգարան, ապա հաշվարկեք, թե որն է ավելի շահավետ՝ մեկանգամյա այցելությունները, թե բաժանորդագրությունը։
• Խնայողաբար օգտագործեք ջուրը և էլեկտրաէներգիան
• Ինքնաբուխ ծախսերից խուսափելու համար խանութ գնացեք ցուցակով։
• Վերահսկեք, թե ինչ վճարովի ծառայություններից ու սակագներից եք օգտվում։ Ժամանակ առ ժամանակ կարող են հայտնվել ավելի շահավետ տարբերակներ։ Բացի այդ, որոշ բաժանորդագրություններ ժամանակի ընթացքում դառնում են ոչ ակտուալ։
• Պլանավորեք ձեր օրը, դա կօգնի նվազեցնել որոշ ավելորդ ծախսեր, ինչպիսիք են տաքսին, առաքումը և լանչը։
• Ուշադրություն դարձրեք բոնուսներ, զեղչեր և քեշբեք ստանալու հնարավորություններին:
• Մի փորձեք խնայել ամեն ինչի վրա: Այսպես, վերանորոգման համար սարքավորումներ և նյութեր գնելիս պետք է գնահատել որակի և արժեքի հարաբերակցությունը, կանխատեսել ծառայության ժամկետը:

Ավելացրեք եկամուտը Գնաճի բացասական հետևանքներից կարելի է պաշտպանվել՝ ավելացնելով սեփական եկամուտը։ Մտածեք հմտությունները զարգացնելու ուղղությամբ՝ ավելի բարձր պաշտոնի հավակնելու կամ լրացուցիչ եկամտի աղբյուր գտնելու նպատակով։ Ապագայում եկամուտների ավելացման ուղիներից մեկը ներդրումներն են։ Եթե ​​դուք ակտիվներ եք ընտրում ներդրումների համար, երբ գների սրընթաց աճ չկա, անհրաժեշտ է համատեղել տարբեր գործիքներ՝ ելնելով ֆինանսական նպատակներից և ժամկետներից, մասնավորապես՝ բանկային ավանդները և անշարժ գույքը: Ճիշտ է, այստեղ պետք է հաշվի առնել, որ բանկային ավանդները եկամուտների կրկնապատկման առումով ամենաարդյունավետ գործիքը չեն, քանի որ դրանք հնարավոր է չծածկեն գնաճից առաջացած վնասները։ Ճգնաժամային պայմաններում բանկերը կարող են բարձրացնել տոկոսադրույքները՝ հաճախորդներին պահելու համար, բայց իջեցնում են դրանք հենց ամենալարված պահն անցնում է։ Ավանդը, առաջին հերթին, հուսալի տարբերակ է կարճաժամկետ ներդրումների համար՝ միջոցները տոկոսադրույքով ապահով տեղաբաշխելու համար: Գնաճի ժամանակ շատերը ներդրումներ են կատարում անշարժ գույքի մեջ: Ընդ որում, գնաճի տեմպերին զուգահեռ բարձրանում է ոչ միայն օբյեկտի գինը, այլեւ վարձավճարի չափը, որը ձեռնտու է սեփականատիրոջը։ Մասնավոր ներդրողի համար կարևոր է գնաճի ժամանակ վերահսկել անձնական ցուցանիշները և գործիքներ փնտրել կապիտալը պաշտպանելու համար: Նման ժամանակահատվածում ներդրումների հիմնական առավելությունն ակտիվների միջև ռիսկերի բաշխումն է, եկամտի գնողունակության և պորտֆելի արժեքի պահպանումը: Զարգացեք Թվում է, թե անհատը չի կարողանում ազդել երկրների տնտեսությունները ձևավորող գործընթացների և իրադարձությունների վրա: Ըստ էության, մեր առջև նման խնդիր չկա։ Կենտրոնացեք սեփական ֆինանսների կառավարման և անձնական նպատակների վրա: Ի՞նչ կարելի է անել հիմա գնաճի բացասական հետևանքներից խուսափելու համար․

• Բարձրացրեք ձեր ֆինանսական կրթվածության մակարդակը: Կարդացեք կայքեր և ալիքներ, որոնք հետաքրքիր պատմում են ֆինանսների մասին և վերլուծում կոնկրետ դեպքեր: Դա կօգնի ձեզ ներգրավվել թեմայի մեջ և զգալ, որ տնտեսագիտությունը վերացական հասկացություն չէ, այլ ձեր կյանքի մի մասը՝ տարբեր դրսևորումներով։ Եթե ​​դուք տեղեկատվություն եք տեսնում գների գալիք բարձրացման մասին, պետք չէ իմպուլսիվ քայլեր ձեռնարկել: Օրինակ՝ որոշ մարդիկ ներդրումներ են կատարում կենցաղային տեխնիկայի մեջ, իսկ հետո ստիպված են լինում վերավաճառել դրանք հսկայական զեղչերով։ Կարևոր է վերլուծել սեփական բյուջեն և աշխատել դրա թույլ կողմերի վրա:
• Եթե դեռ չեք հաշվարկում բյուջե, սկսեք դա անել: Այս քայլն իսկապես կարևոր է ոչ միայն անձնական գնաճը հաշվարկելու, այլ ընդհանրապես սեփական ֆինանսները կառավարելու համար։ Գրանցեք բոլոր ծախսերն ու եկամուտները՝ դրանք բաժանելով տարբեր կատեգորիաների: Միևնույն ժամանակ, կարևոր է գործընթացը հնարավորինս հարմարավետ դարձնել և ձգտել ավտոմատացման: Ստեղծեք աղյուսակների նմուշներ կամ գտեք հարմար տարբերակներ առցանց: Կարելի է նաև ներբեռնել հաշվարկի համար նախատեսված հավելված։

Բյուջեի հաշվարկը կօգնի հասկանալ, թե ուր են գնում ձեր գումարները և օպտիմալացնել ծախսերը, ինչը հատկապես կարևոր է գնաճի պայմաններում:   Եզրափակելով՝ հիշեցնենք, որ թանկացումները մշտապես առկա են տնտեսության մեջ։ Կարևոր է հետևել դրա տեմպերին և պատրաստ լինել ճգնաժամային պահերին։ Եղեք տեղեկացված և կարդացեք նորություններ տարբեր աղբյուրներում, բայց միշտ համեմատեք պաշտոնական տվյալները անձնական ցուցանիշների հետ: Սեփական ֆինանսների պաշտպանությունը յուրաքանչյուրի պատասխանատվությունն է։ Նյութը պատրաստվել է ԱՌԿԱ, «ԱՄԻ Նովոստի-Արմենիա» գործակալության և Freedom Broker Armenia–ի «Ֆինանսական ինքնակրթման տարի» համատեղ նախագծի շրջանակում: