Ferrari-ն ԱՄՆ-ի հաճախորդներից կրիպտոարժույթով վճարումներ կընդունի

Ferrari-ի մարքեթինգի և առևտրի տնօրեն Էնրիկո Գալիերան ասել է, որ ընկերությունն այսուհետև ԱՄՆ-ի հաճախորդներից կրիպտոարժույթով վճարումներ կընդունի։ Էնրիկո Գալիերայի խոսքով գները նույնն են լինելու, իսկ արտադրողը հավելյալ վճարումներ չի գանձի նրանցից, ովքեր գնում են կրիպտոարժույթով,- գրում է fintech.am-ը: Ըստ Գալիերայի, այս որոշմամբ Ferrari-ն որոշել է պատասխանել շուկայի պահանջներին, քանի որ իր հաճախորդներից շատերը ներդրումներ են կատարում կրիպտոարժույթներում: «Մեր հաճախորդներից ոմանք երիտասարդ ներդրողներ են, ովքեր իրենց գումարը վաստակում են կրիպտոարժույթներով: Նրանց մի մասն էլ զբաղվում է ավելի ավանդական ներդրումներով, բայց ցանկանում են դիվերսիֆիկացնել իրենց պորտֆելը»,- նշում է ընկերության տնօրենը։ Ընկերությունը նախատեսում է նաև կրիպտոարժույթով մեքենաների վաճառքը սկսել Եվրոպայում՝ 2024 թվականի առաջին եռամսյակում, որից հետո այս հնարավորությունը կընդլայնի բոլոր այն երկրներում, որտեղ թվային արժույթներն օգտագործվում են որպես վճարման միջոց։ Ընդունված կրիպտոարժույթների ցանկը կարող է տարբեր լինել՝ կախված երկրից: