Վիճակագրական կոմիտեն վերանայել է 2023-24 թթ. ՀՆԱ-ի ցուցանիշները

Հայաստանի վիճակագրական կոմիտեն վերանայել է Հայաստանի 2023 թվականի ՀՆԱ–ի տարեկան և եռամսյակային ցուցանիշները, ինչպես նաև այս տարվա առաջին եռամսյակի ՀՆԱ ցուցանիշը։ Ըստ գերատեսչության, ՀՆԱ-ի սույն վերանայումները հիմնականում պայմանավորված են ռեսպոնդենտի կողմից 2024թ․-ի ապրիլ ամսվա հաշվետվության ներկայացման ժամանակ 2023թ․-ի հոկտեմբեր, նոյեմբեր և դեկտեմբեր, ինչպես նաև 2024թ․-ի առաջին երեք ամիսների տվյալների ճշգրտմամբ՝ կապված տնտեսական գործունեության տեսակների վերադասակարգման հետ։ «Վերանայման արդյունքում 2023թ․-ի ՀՆԱ-ի արժեքը նվազել է 52 046.6 մլն․դրամով և կազմել 9 453 175.0 մլն․դրամ, իսկ ծավալի ինդեքսը նվազել է 0․4 տոկոսային կետով և կազմել 108․3 տոկոս։ Իր հերթին, 2024թ․-ի I եռամսյակի ՀՆԱ-ի արժեքը նվազել է 48 290.8 մլն․դրամով և կազմել 1 922 939.6 մլն․ դրամ, իսկ ծավալի ինդեքսը նվազել է 2.6 տոկոսային կետով և կազմել 106.6 տոկոս»,- ասվում է հաշվետվության մեջ։ Հայաստանի տնտեսական աճը 2023 թվականի պետական ​​բյուջեով նախատեսված էր 7 տոկոսի չափով։ Ազգային վիճակագրական կոմիտեի նախնական տվյալներով՝ Հայաստանի ՀՆԱ-ն 2023 թվականին, 2022 թվականի համեմատ, աճել է 8,7 տոկոսով։ Անվանական արտահայտությամբ Հայաստանի ՀՆԱ-ն ընթացիկ գներով 2023 թվականի արդյունքում կազմել է 9,502,778.6 մլն դրամ։ Նախնական տվյալներով՝ Հայաստանի ՀՆԱ-ն 2024 թվականի առաջին եռամսյակում, 2023 թվականի հունվար-մարտի համեմատ, աճել է 9,2 տոկոսով։ Անվանական արտահայտությամբ Հայաստանի ՀՆԱ-ն ընթացիկ գներով հաշվետու ժամանակաշրջանի արդյունքում կազմել է 1 971 230.4 մլն դրամ ($1 - 388,16 դրամ)։ arka.am