2026 թվականի հունվարի 8-ի դրությամբ Սևանա լճի մակարդակը նախորդ տարվանից ցածր է 16 սմ-ով

Սևանա լիճ է տեղափոխվել 1 միլիոն 58 հազար խորանարդ մետր ջուր։

ՀՀ ՇՄՆ «Հիդրոօդերևութաբանության և մոնիտորինգի կենտրոն» ՊՈԱԿ-ի տեղեկագրի համաձայն՝ 2026 թվականի հունվարի 8-ի դրությամբ Սևանա լճի մակարդակը ծովի մակերևույթից կազմել է 1900 մետր 22 սանտիմետր։

Նշված ցուցանիշը 16 սանտիմետրով ցածր է նախորդ տարվա նույն օրում գրանցված մակարդակից։

Միևնույն ժամանակ տեղեկացվում է, որ 2026 թվականի առաջին ութ օրերի ընթացքում Արփա–Սևան թունելային ջրատարով Սևանա լիճ է տեղափոխվել 1 միլիոն 58 հազար խորանարդ մետր ջուր։

ՇՄՆ տվյալներով՝ Սևանա լիճ թափվող գետերը ներկայում գտնվում են ձմեռային սակավաջուր փուլում, ինչը բնորոշ է տարվա այս ժամանակահատվածին և ազդում է լճի բնական լրացման տեմպերի վրա։