2025 թվականին Ադրբեջանի տարածքով երկաթուղային փոխադրման միջոցով Հայաստան է ներմուծվել 6580 տոննա հացահատիկ։ Տվյալ խմբաքանակից 1000 տոննան եղել է ղազախական, իսկ 5580 տոննան՝ ռուսական ծագման։ Նույն երթուղով Հայաստան է մտել նաև 1210 տոննա ադրբեջանական բենզին։ Տվյալները ներկայացրել է ՀՀ էկոնոմիկայի նախարար Գևորգ Պապոյանը։
2026 թվականի հունվարի 8-ի դրությամբ Ադրբեջանի տարածքով երկաթուղու միջոցով Հայաստան է ներմուծվել 8485 տոննա ռուսական հացահատիկ, ևս 4103 տոննա գտնվում է ճանապարհին։ Միաժամանակ ճանապարհին է գտնվում 7600 տոննա ադրբեջանական նավթամթերք, որից 6100 տոննան բենզին է, իսկ 1500 տոննան՝ դիզելվառելիք։
Նախարարության ներկայացմամբ՝ ակնկալվում է բենզինի և դիզելվառելիքի գնի նվազում մինչև 80 դրամով մեկ լիտրի հաշվով՝ նախորդ ամսվա գների համեմատ։
Տվյալ զարգացումների ֆոնին նավթամթերք իրացնող այլ ընկերություններ նույնպես սկսել են վերանայել գնային քաղաքականությունը՝ գների նվազման ուղղությամբ։
