2025-ին Հայաստանում սննդային թունավորումների դեպքերի թիվը կտրուկ նվազել է

2025 թվականին կայացվել է նաև վարչական տուգանք նշանակելու վերաբերյալ 1455 որոշում

Հայաստանում 2025 թվականի ընթացքում արձանագրվել է սննդային թունավորման 21 դեպք, որոնց հետևանքով տուժել է 64 մարդ։ Դեպքերի մեծ մասը գրանցվել է հանրային սննդի օբյեկտներում։ Տվյալները ներկայացվել են Սննդամթերքի անվտանգության տեսչական մարմնի (ՍԱՏՄ) տարեկան ամփոփիչ ասուլիսի ընթացքում։

Համեմատության համար նշվել է, որ նախորդ տարում միայն 5 ամսվա ընթացքում արձանագրվել էր 77 սննդային թունավորման դեպք։ Դրանցից 14-ը պայմանավորված էին բոտուլիզմով, 2-ը՝ ստաֆիլակոկով, 5-ը՝ այլ մանրէային չճշտված սննդով, իսկ 56 դեպք կապված էր սնկերի օգտագործման հետ։ Այս համեմատությունը ցույց է տալիս դեպքերի թվի զգալի նվազում 2025 թվականին։

ՍԱՏՄ ղեկավար Տիգրան Պետրոսյանի տվյալներով՝ 2025 թվականին գրանցված թունավորումների հիմնական պատճառները եղել են սանիտարահիգիենիկ նորմերի խախտումը և խաչաձև աղտոտվածությունը։ Ամենախոշոր դեպքը գրանցվել է մեկ շաուրմայանոցում, որտեղ թունավորվել է 12 մարդ, մինչդեռ մյուս դեպքերում տուժածների թիվը կազմել է 1–2 անձ։

Տեսչական մարմինը կարևորում է կանխարգելման գործիքների ուժեղացումը։ Այդ համատեքստում նշվել է, որ 2026 թվականից ՍԱՏՄ-ում կգործի HACCP համակարգը (Վտանգի աղբյուրների վերլուծություն և կրիտիկական կետերի հսկում), որը նախատեսված է սննդային ռիսկերի համակարգային վերահսկման համար։

Արտադրական գործունեությունների կասեցումների մասով 2025 թվականին գրանցվել է աճ։ Ընդհանուր առմամբ կայացվել է 200 կասեցման որոշում, որոնցից 131-ը վերացվել են տարվա ընթացքում, իսկ մնացածը տարվա ավարտին եղել են ընթացքի մեջ։ Կասեցումների 101 դեպք արձանագրվել է ոչ պլանային ստուգումների և մշտադիտարկումների արդյունքում, այդ թվում՝ քաղաքացիների բողոքների հիման վրա։

2025 թվականին կայացվել է նաև վարչական տուգանք նշանակելու վերաբերյալ 1455 որոշում՝ ավելի քան 339 մլն դրամ ընդհանուր գումարով։ Տարեվերջի դրությամբ գանձվել է շուրջ 270 մլն դրամ։ Նախորդ երկու տարիների համեմատ այս ցուցանիշը զգալի աճ է արձանագրել, ինչը, ըստ տեսչական մարմնի, պայմանավորված է վերահսկողության ծավալի ընդլայնմամբ։