2025-ին Բնապահպանության և ընդերքի տեսչական մարմինը արձանագրել է 1,264 իրավախախտում

Անազատության մեջ պահվող 3 կենդանի՝ 1 գայլ, 1 բվիկ և 1 ճուռակ, վերադարձվել են վայրի բնություն։

Բնապահպանության և ընդերքի տեսչական մարմինը 2025 թվականին իրականացված վերահսկողական միջոցառումների արդյունքում արձանագրել է 1,264 իրավախախտում։ Ստուգումների ընթացքում արձանագրվել է 11,852 ապօրինի հատված ծառ և 4,255.2 խմ ապօրինի փայտանյութ։

Տարվա ընթացքում իրականացվել է 8 ստուգում «Հայանտառ» ՊՈԱԿ-ի 6 մասնաճյուղերում։

Արձանագրված իրավախախտումների շրջանակում կիրառվել է 293 վարչական տույժ, նշանակվել է շուրջ 30.3 մլն դրամ տուգանք։ Միաժամանակ հաշվարկվել է շուրջ 907.9 մլն դրամի բնապահպանական վնաս։

Վայրի կենդանիների պահման պայմանների խախտման և ապօրինի որսի 38 դեպքերի շրջանակում հայտնաբերվել է 284 կենդանի, որոնք ստացել են պաշտպանություն կամ վերադարձվել են բնական միջավայր։

Տեսչական միջոցառումների ընթացքում առգրավվել են 13 հրացան, 22 փամփուշտ, 21 լողամիջոց, 248 ձկնորսական ցանց և 4 ինքնաշեն մետաղական օղակ։

Անազատության մեջ պահվող ՀՀ Կարմիր գրքում գրանցված 7 կենդանի՝ 6 անդրկովկասյան գորշ արջ և 1 բեզոարյան այծ, տեղափոխվել են կենդանիների համար առավել բարենպաստ պայմաններ ապահովող ապաստարաններ և կացարաններ։

Բացի այդ, անազատության մեջ պահվող 3 կենդանի՝ 1 գայլ, 1 բվիկ և 1 ճուռակ, վերադարձվել են վայրի բնություն։ Քաղաքացիների կողմից հայտնաբերված ՀՀ Կարմիր գրքում գրանցված 2 թռչուն՝ 1 սապսան և 1 մեծ ենթարծիվ, տեղափոխվել են Երևանի կենդանաբանական այգի։

Ներկայացված տվյալները ցույց են տալիս, որ 2025 թվականին բնապահպանական վերահսկողության շրջանակում արձանագրվել են ինչպես իրավախախտումների բացահայտման, այնպես էլ կենդանական աշխարհի պաշտպանությանն ուղղված գործողություններ։