2007թ. հունվարի 9-ին Սթիվ Ջոբսը ներկայացրեց առաջին iPhone-ը

Առաջին iPhone-ը համադրում էր բջջային հեռախոսի, iPod-ի և ինտերնետ բրաուզերի գործառույթները՝ հպումային էկրանի միջոցով։

2007 թվականի հունվարի 9-ին Apple-ի համահիմնադիր և գործադիր տնօրեն Սթիվ Ջոբսը Սան Ֆրանցիսկոյում անցկացվող Macworld Conference & Expo միջոցառման ընթացքում ներկայացրեց մի սարք, որը հետագայում արմատապես փոխեց տեխնոլոգիական աշխարհը՝ առաջին iPhone-ը։

«Այսօր մենք ներկայացնում ենք երեք հեղափոխական սարք…», — հայտարարեց Ջոբսը՝ ներկայացնելով լայնէկրան iPod-ը հպման կառավարմամբ, նորարարական հեռախոսը և ինտերնետ կապով շարժական սարքը։ Այնուհետև նա հավելեց, որ դրանք իրականում միավորված են մեկ սարքի մեջ՝ iPhone-ում։

Առաջին iPhone-ը համադրում էր բջջային հեռախոսի, iPod-ի և ինտերնետ բրաուզերի գործառույթները՝ հպումային էկրանի միջոցով։ Սարքը առանձնանում էր ֆիզիկական ստեղնաշարի բացակայությամբ, multi-touch տեխնոլոգիայով և ամբողջական վեբ բրաուզերով, ինչը տվյալ ժամանակահատվածում համարվում էր հեղափոխական մոտեցում։

Apple-ի գնահատմամբ՝ iPhone-ը կոչված էր փոխելու ոչ միայն բջջային հեռախոսների, այլև ընդհանրապես թվային տեխնոլոգիաների օգտագործման մշակույթը։

Առաջին iPhone-ի վաճառքը ԱՄՆ-ում մեկնարկեց 2007 թվականի հունիսի 29-ին։ Սարքի գինը տատանվում էր մոտ 500–600 դոլարի սահմաններում, ինչը տվյալ ժամանակի համար համարվում էր բավական բարձր արժեք։

Նշենք, որ այսօր արդեն վաճառքում է iPhone 17-ը, որի մեկնարկային գինը սկսվում է մոտ 800 դոլարից, իսկ iPhone-ը շարունակում է մնալ աշխարհում ամենաազդեցիկ տեխնոլոգիական արտադրանքներից մեկը։