Հայաստանի Հաշվապահների Ասոցիացիան հիմնադրվել է 2014թ. նոյեմբերի 10-ին՝ Հայաստանում գործող մի քանի տասնյակ հաշվապահական հաշվառման գրասենյակների ներկայացուցիչների նախաձեռնությամբ: Ասոցիացիայի առաքելությունն է՝ հաշվապահների մասնագիտական-սոցիալական պատասխանատվության բարձրացմամբ նպաստել Հայաստանի Հանրապետությունում հաշվապահական և հարկային հաշվառման համակարգի կայացմանը, որն իր հերթին կնպաստի գործարար միջավայրի բարելավմանը, երկրի տնտեսության և քաղաքացիական հասարակության զարգացմանը: Ներկայում ասոցիացիային անդամակցում են 405 հաշվապահներ և ոլորտի այլ մասնագետներ: Ասոցիացիային անդամակցում է 44 հաշվապահական հաշվառման գրասենյակ, որոնցից 37-ը գործում են մարզային քաղաքներում, իսկ 7-ը՝ Երևան քաղաքում: Գրասենյակների կողմից այս պահին սպասարկվում են մոտ 13.200 գործող հաճախորդ: Իրավական ակտերում հակասություններ, երկիմաստություններ կամ տարընթերցումներ պարունակող դրույթների պարզաբանման նպատակով, Ասոցիացիան ըստ անհրաժեշտության, կազմում և պետական մարմիններին է ուղարկում հարցումներ։ Մինչ այժմ Ասոցիացիայի կողմից պետական մարմիններ է ուղարկվել 379 հարցում, որոնցից այս պահին պատասխանվել է 312-ին։ https://youtu.be/dUtN115SJBw Ընդգրկված լինելով մի շարք պետական մարմինների հասարակական խորհուրդների կազմում՝ Ասոցիացիան, իր անդամ հաշվապահների իրավակիրառ պրակտիկայում հանդիպած խնդիրները հավաքագրելով և դրանք վերլուծելով, առաջարկներ է ներկայացնում համապատասխան քաղաքականություն և վարչարարություն մշակող պետական մարմիններ, Ազգային ժողով և հետևողական գործունեության արդյունքում բարելավում է գործարար միջավայրի օրենսդրական դաշտը: Մինչ այժմ Ասոցիացիայի կողմից պետական մարմիններ է ներկայացվել 184 օրենսդրական առաջարկ, որոնցից այս պահին ընդունվել է 115-ը։ Ասոցիացիան, հանդես գալով որպես կապող օղակ պետություն-մասնավոր հատված երկխոսության շրջանակներում, համագործակցում է պետական մարմինների հետ։ Ասոցիացիան ցուցաբերում է ակտիվ մասնակցություն ոլորտի իրավական ակտերի, փաստաթղթաշրջանառության կամ նմանատիպ այլ հարցերի հետ առնչվող հանրային քննարկումներին` հանդիսանալով մի շարք հասարակական խորհուրդների և աշխատանքային խմբերի անդամ։