18,3 տրիլիոն դոլար՝ մի քանի ձեռքերում․ անհավասարության վտանգավոր աճը աշխարհում

Տնտեսական հզորությունը հաճախ վերափոխվում է քաղաքական ազդեցության:

Oxfam բարեգործական կազմակերպությունների միավորման տարեկան զեկույցի համաձայն՝ միլիարդատերերի համակցված կարողությունը վերջին մեկ տարվա ընթացքում աճել է 2,5 տրիլիոն դոլարով՝ հասնելով պատմական ռեկորդային՝ 18,3 տրիլիոն դոլար։

Ինչպես հաղորդում է DW-ն, 2020 թվականի մարտից ի վեր, միլիարդատերերի ընդհանուր կարողությունն աճել է 81 տոկոսով։ Զեկույցում նշվում է, որ աշխարհի ամենահարուստ մարդը՝ Իլոն Մասկը, ընդամենը չորս վայրկյանում վաստակում է այն չափով, որքան համաշխարհային միջին տարեկան եկամուտն է։

Միևնույն ժամանակ, Oxfam-ի տվյալներով՝ մարդկության գրեթե կեսը շարունակում է ապրել աղքատության պայմաններում։ Այս խմբին բաժին է հասնում համաշխարհային հարստության ընդամենը 0,52 տոկոսը, մինչդեռ գերհարուստ մարդկանց 1 տոկոսը վերահսկում է համաշխարհային հարստության 43,8 տոկոսը։

«Մենք ապրում ենք միլիարդատերերի դարաշրջանում, և դա վատ լուր է աշխարհի համար»,- հայտարարել է Գերմանիայի Oxfam մասնաճյուղի ղեկավար Շառլոթ Բեքերը։ Նրա խոսքով՝ հատկապես մտահոգիչ է այն, որ գերհարուստների տնտեսական հզորությունը հաճախ վերափոխվում է քաղաքական ազդեցության, ինչը լուրջ սպառնալիք է ժողովրդավարական ինստիտուտների համար։

Oxfam-ը կոչ է անում վերանայել հարկային քաղաքականությունները, սահմանել ավելի բարձր հարկեր գերհարուստների համար և ներդնել հարստության վերաբաշխման մեխանիզմներ՝ սոցիալական անհավասարությունը նվազեցնելու նպատակով։