Հայաստանի ֆոնդային բորսայում առաջին անգամ տեղի է ունեցել փոխանակման աճուրդ

Այսօր՝ դեկտեմբերի 17-ին Հայաստանի ֆոնդային բորսայում  տեղի ունեցավ առաջին պետական պարտատոմսերի փոխանակման աճուրդը, որը կարևոր քայլ է Հայաստանի պետական պարտքի կառավարման ռազմավարության և պետության ֆինանսական կայունության համար։ Փոխանակման աճուրդի շրջանակում տարբերակիչ ծածկագրով AMGN36294277 պետական պարտատոմսերը հաջողությամբ տեղաբաշխվել են 5 մլրդ ՀՀ դրամ ընդհանուր ծավալով: Այս պարտատոմսերը փոխակերպվել/հետգնվել են AMGN36294251 ծածկագրով պետական պարտատոմսերով՝ 4.8 մլրդ ՀՀ դրամ ընդհանուր ծավալով: Փոխանակման աճուրդի տվյալները՝ Թողարկման ծավալ – 5 մլրդ ՀՀ դրամ Ներկայացված առաջարկությունների ընդհանուր ծավալը – 11․2 մլրդ ՀՀ դրամ Բավարարված  առաջարկությունների ընդհանուր ծավալը – 5 մլրդ ՀՀ դրամ Աճուրդի միջին կշռված գնի եկամտաբերությունը – 10.48% Մարման ամսաթիվ - 4/29/2027 Տեղաբաշխված պարտատոմսերի ծավալը – 5 մլրդ ՀՀ դրամ Հետգնված պարտատոմսերի ծավալը - 4.8 մլրդ ՀՀ դրամ Դեռևս 2024 թվականի ապրիլին ՀՀ կառավարությունն ընդունել էր որոշում, որը նախատեսում էր ներդնել գանձապետական պարտատոմսերի փոխանակման աճուրդների մեխանիզմները։ Այս քայլը միտված էր ընդլայնելու ներքին պետական պարտքի գործիքակազմը և խթանելու դրա արդյունավետ կառավարումը՝ միաժամանակ նպաստելով շուկայի ակտիվացմանը։ Փոխանակման աճուրդների իրականացումը խթանելու է պետական պարտատոմսերի իրացվելիությանը և կնվազեցնի վերաֆինանսավորման ռիսկերը։ Բացի այդ, հնարավոր կլինի աստիճանաբար շուկայից դուրս բերել հին կամ ոչ իրացվելի պարտատոմսեր՝ դրանք փոխարինելով նոր թողարկվող պարտատոմսերով։ Նման գործիքներ աշխարհում կիրառում են քիչ թվով երկրներ, ինչպիսիք են Կանադան, Շվեդիան, Դանիան և այլ երկրներ։ Ներդրողների համար՝ նոր մեխանիզմը հնարավորություն է տալիս պետական պարտատոմսերի ավելի ճկուն կառավարմանը, որը նպաստում է իրենց ներդրումային պորտֆելի արդյունավետ վերակազմավորմանը։ Փոխանակման աճուրդի առաջին հաջող փորձը հիմք է նոր նախաձեռնությունների և գործիքների ներդրման համար՝ ամրապնդելով ֆինանսական շուկայի գործիքակազմը և ավելացնելով ներդրումային հնարավորությունները Հայաստանի համար։ Հայաստանի ֆոնդային բորսայի մասին Հայաստանի ֆոնդային բորսան Հայաստանում գործող արժեթղթերի կարգավորվող շուկայի միակ օպերատորն է։ AMX-ն առաջարկում է բորսայական ծառայությունների ամբողջական փաթեթ՝ ցուցակման, առևտրի, քլիրինգային և տեղեկատվական ծառայություններ,  այլընտրանքային բորսայական լուծումներ։ Բորսայական վերջնահաշվարկն իրականացնում է Հայաստանի կենտրոնական դեպոզիտարիան, որի 100% բաժնետերը Հայաստանի ֆոնդային բորսան է։ AMX-ի առաքելությունն է զարգացնել կապիտալի շուկայի բորսայական ենթակառուցվածքը՝ այն դարձնելով ֆինանսավորման ակտիվ գործիք Հայաստանի տնտեսության զարգացման համար։ Լրացուցիչ տեղեկությունների համար խնդրում ենք զանգահարել +374 60 69 55 55 (ներքին` 142) հեռախոսահամարին կամ գրել  [email protected] հասցեին։