Արագածոտնում կստեղծվի ազատ տնտեսական գոտի

Կառավարության նիստի ընթացքում որոշվել է ստեղծել ազատ տնտեսական գոտի (ԱՏԳ) Արագածոտնի մարզի Ապարան համայնքի Եղիպատրուշ գյուղում, նպատակ ունենալով խթանել ներդրումների ներգրավումը, բարձրացնել երկրի ներդրումային և զբոսաշրջային գրավչությունը, ստեղծել նոր աշխատատեղեր և ապահովել կայուն տնտեսական զարգացում: ԱՏԳ-ի ստեղծմամբ Արագածոտնի մարզում ակնկալվում է խթանել զբոսաշրջության զարգացումը և ներդրումների ներգրավումը, ինչպես նաև ստեղծել նոր աշխատատեղեր: Ծրագրի նպատակն է կառուցել բարձր չափանիշներին համապատասխան լեռնադահուկային հանգստավայր, որը կնպաստի Հայաստանի զբոսաշրջային գրավչության և մարզի սոցիալ-տնտեսական կայուն զարգացման բարձրացմանը: Ծրագրի շրջանակներում նախատեսվում է կազմակերպչի կողմից կատարել մինչև 30 միլիարդ դրամի ներդրումներ՝ սահուղիների, արհեստական ձնագոյացման համակարգի, ժամանցային կենտրոնների (տոբոգան, տյուբինգ, «կախարդական գորգ», զիփլայն, ջրային ատրակցիոններ) և այլ ենթակառուցվածքների կառուցման համար: Ծրագրի համաձայն՝ բացի հիմնական ենթակառուցվածքներից, նախատեսվում է կառուցել ճոպանուղիներ, երեք հյուրանոց, ռեստորան, սահադաշտ, մանկական զբաղմունքի կենտրոն, սպա կենտրոն, որոնք կստեղծեն բազմաթիվ աշխատատեղեր։ ԱՏԳ-ի ստեղծման դեպքում առաջին փուլում նախատեսվում է ապահովել 1,500 աշխատատեղ, իսկ երրորդ փուլում՝ 10,400։ Միջին ամսական աշխատավարձը առաջին փուլում կկազմի 180,000 դրամ, հետագա աճման միտումով: «Մայլեռ ԱՏԳ» ՍՊԸ-ն ծրագրի իրականացման ընթացքում արդեն իրականացրել է 15 միլիոն ԱՄՆ դոլարի ներդրումներ ենթակառուցվածքների ձևավորման համար և ստեղծել է 90-100 նոր աշխատատեղ: Զբոսաշրջային հոսքերի կանխատեսումների համաձայն՝ առաջին փուլի ավարտին նախատեսվում է, որ ձմեռային սեզոնին հանգստավայր կայցելի օրական մինչև 20,000 մարդ։