Անցնող շաբաթվա այլ կարևոր իրադարձությունները ֆինանսական շուկաների համար ԱՄՆ-ում հունիսին սպառողական գների ինդեքսը տարեկան կտրվածքով աճել է 3%-ով, իսկ ամսական կտրվածքով նվազել է 0.1%-ով՝ գրանցելով առաջին անկումը 2020թ.-ի մայիսից ի վեր։ Պարտատոմսերի համաշխարհային ֆոնդերն արդեն 29-րդ օրն անընդմեջ ահռելի ներհոսք են ապահովում ներդրողների շրջանում Դաշնային պահուստային համակարգի կողմից տոկոսադրույքների կրճատման հետ կապված սպասումների ֆոնին։ Վերջին շաբաթվա ընթացքում դեպի ֆոնդեր զուտ ներհոսքը կազմել է 9.75 միլիարդ դոլար։ ԱՄՆ-ում գործազրկության նպաստի առաջնային դիմումների թիվը հուլիսի 6-ին ավարտվող շաբաթվա ընթացքում նվազել է 17,000-ով և կազմել 222,000՝ հասնելով մայիսից ի վեր նվազագույն մակարդակին։ Ռուսաստանում հիփոթեքային վարկերի միջին տոկոսադրույքը մոտենում է տարեկան 20%-ին։ Վարկատու ֆինանսական կազմակերպություններն այս բարձրացումը կապում են պետական պարտատոմսերի տոկոսադրույքների բարձրացման հետ։ Reuters-ի հարցումների արդյունքներով Ճապոնիայում հունիսին գնաճը տարեկան կտրվածքով կկազմի 2.7%՝ նախորդ ամսվա 2.5%-ից հետո։ Ճապոնիայի կենտրոնական բանկը հավանաբար այս տարվա ընթացքում կբարձրացնի վերաֆինանսավորման տոկոսադրույքը։  finarm.am