ՊԵԿ հայտարարություն․ Պարզեցվել է ավելի վճարված մաքսային վճարի վերադարձի կարգը

Պետական եկամուտների կոմիտեն տեղեկացնում է, որ մաքսային վարչարարության բարելավման շնորհիվ պարզեցվել և ներդրվել է ավելի վճարված մաքսատուրքի, հարկի, փոխհատուցման տուրքի, միասնական մաքսային վճարի և տուգանքի գումարի հաշվանցման կամ վերադարձման նոր ընթացակարգ: Զգալի կրճատվել է գումարի վերադարձման ժամկետը: Այսպես, նոր ընթացակարգով ավելի վճարված մաքսային վճարի վերադարձը հնարավոր է կազմակերպել 3-5 աշխատանքային օրվա ընթացքում՝ նախկին՝ 15-20 օրվա փոխարեն։ Իսկ ավելի վճարված ներմուծման մաքսատուրքը, ԵԱՏՄ տուրքը տնտեսվարողին վերադարձնում է Պետական եկամուտների կոմիտեն՝ client-tresury էլեկտրոնային ծրագրի միջոցով՝ ավելի կարճ ժամկետում: Փոփոխության շնորհիվ առավելագույն օպտիմալացվել է նաև գործընթացի ուղղությամբ տարվող աշխատանքը: Մասնավորապես, նախկինում մաքսային մարմնի մի քանի ստորաբաժանումների փոխարեն գործընթացն այժմ համակարգում է ՊԵԿ մաքսային վիճակագրության և եկամուտների հաշվառման վարչությունը: