Հայաստանը պատրաստվում է նոր ատոմակայան կառուցել. ԱՐՄԵՆՊՐԵՍ

Հայաստանը կանգնած է կարևոր փուլում՝ նոր ատոմակայանի կառուցման, ճանապարհային ենթակառուցվածքների զարգացման և միջազգային ավիացիոն սահմանափակումների հաղթահարման ուղղությամբ:

«Արմենպրես»-ի՝ Հարկ վճարողի օրվա առիթով իրականացվող փոդքասթային շարքի շրջանակում Տարածքային կառավարման և ենթակառուցվածքների նախարար Դավիթ Խուդաթյանը բացահայտում է այս և մի շարք այլ կարևոր նախաձեռնությունների ընթացքը:

Նոր ատոմակայան. երբ և որտե՞ղ

Հայաստանը մինչև 2025 թվականը նպատակ ունի ամբողջացնել նոր ատոմակայանի մոդելի ընտրությունը։ Նոր կայանը, ըստ նախնական մոտեցման, կկառուցվի գործող Մեծամորի ատոմակայանի տարածքում՝ օգտագործելով առկա ենթակառուցվածքները։

Նախարարի խոսքով՝ ընտրության գործընթացում դիտարկվում են տարբեր երկրների առաջարկներ, իսկ նորաստեղծ պետական ՓԲԸ-ն տրամադրելու է համապատասխան խորհրդատվություն։ Նախապատվությունը կտրվի այն մոդելին, որն առավել ձեռնտու կլինի թե՛ տնտեսական, թե՛ տեխնիկական տեսանկյունից:

Նշենք՝ մինչև նոր կայանի կառուցումը, կառավարությունը փորձում է պահպանել Մեծամորի ՀԱԷԿ-ի աշխատանքը՝ առանց էլեկտրաէներգիայի խափանումների։ Միաժամանակ ընթանում է կայանի շահագործման ժամկետի երկարաձգման գործընթաց, որի շրջանակում 2026-ին նախատեսված է ստուգում՝ ուղղված մինչև 2036 թվականը կայանի շարունակական աշխատանքը երաշխավորելուն։

«Հյուսիս–հարավ» ճանապարհային միջանցք. ինչ փուլում է

2025 թվականին նախատեսվում են ամենամեծ ծավալով աշխատանքները՝ ներառյալ թունելաշինությունը։ Մասնավորապես.

• Քաջարանի թունելի մրցութային գործընթացն արդեն մեկնարկել է։

• Բարգուշատի թունելի կապակցությամբ ընթանում են բանակցություններ եվրոպական շինարարական կազմակերպությունների հետ։

2024 թվականին նախատեսվում է շահագործման հանձնել Գյումրիի ուղղությամբ կառուցվող հատվածներից մեկը։ Հարավային ուղղությամբ արդեն ընթանում է 820 մետր երկարությամբ թունելի շինարարությունը՝ Իրանի գործընկերների հետ համագործակցությամբ։

Ծրագրի ընդհանուր ավարտի ժամկետը դեռ հստակ չէ՝ նախագծման որոշ հատվածների և բարդությունների պատճառով, սակայն քննարկվում է աշխատանքներն ավարտելու նույնիսկ 2033-ից շուտ։

ԵՄ ավիացիոն «սև ցուցակից» դուրս գալու ճանապարհին

Հայաստանը 2024 թվականի վերջում պաշտոնապես տեղեկացրել է Եվրոպական միությանը, որ ավիացիոն ոլորտում նշված թերությունները վերացվել են։

2025-ի ամռանը ակնկալվում է Եվրոպական հանձնաժողովի ներկայացուցիչների այցը՝ տեղում ուսումնասիրելու ուղղությամբ։ Եթե ամեն ինչ ընթանա ըստ պլանի, Հայաստանը կկարողանա վերականգնել լիարժեք ներգրավվածությունը եվրոպական ավիատրանսպորտային տարածքում։

Ծախսերը և ներդրումները

ՏԿԵ նախարարության բյուջեն 2024-ին կազմում է շուրջ 290 միլիարդ դրամ, որից՝

• 90 մլրդ դրամ՝ ուղղվել է համայնքների դոտացիաներին,

• 106 մլրդ դրամ՝ ճանապարհաշինական ծրագրերին,

• 31 մլրդ դրամից ավելի՝ սուբվենցիոն ծրագրերի պետական համաֆինանսավորմանը։

Այս ներդրումներն ուղղված են համայնքների զարգացմանը, ենթակառուցվածքների ամրապնդմանը և տնտեսական ակտիվության խթանմանը:

Բաժանորդագրվեք մեր Տելեգրամյան ալիքին՝ բիզնես ոլորտի ամենաթարմ և կարևոր նորություններին առաջինը ծանոթանալու համար: