Աշխարհը շարունակում է պայքարել գնաճի դեմ: Վերջին օրերին թե` ԱՄՆ Դաշնային պահուստային համակարգը, և թե Անգլիայի բանկը բարձրացրեցին վերաֆինանսավորման տոկոսադրույքը, ԱՄՆ-ն ընթացիկ տարում արդեն 4-րդ անգամ`յուրաքանչյուրը`0.75 տոկոսային կետով: Այժմ այն 3.75-ից 4 տոկոսի միջակայքում է: Սա ամենաբարձր մակարդակն է 2008 թվականից ի վեր: Միացյալ Թագավորությունը ևս 0.75 տոկոսով բարձրացրել է դրույքը` հասցնելով 3 տոկոսի, 1989 թվականից ի վեր, նման ագրեսիվ բարձրացում չէր արվել: Հայաստանի կենտրոնական բանկն էլ օրեր առաջ վերաֆինանսավորման դրույքը բարձրացրեց 0.5 տոկոսով` այն հասցնելով 10.5-ի: Գլխավոր դրամատան համար կանխատեսելի էր Դաշնային պահուստային համակարգի բարձրացումը: Մասնագետները վստահ են` տոկոսադրույքների խստացման քաղաքականությունը աշխարհում դեռ կպահպանվի, իսկ դրանց ազդեցությունը գների վրա նկատելի կլինի որոշակի ժամանակ անց միայն: